Qeveria ka hequr tarifën e shërbimit të legalizimit për ndërtimet pa leje që përdoren si banesa.
Ndryshimi është miratuar përmes dy vendimeve të Këshillit të Ministrave, të botuara në Fletoren Zyrtare nr. 202, të cilat ndërhyjnë në rregullat për evidentimin dhe tarifat e legalizimeve.
Sipas vendimit, në rastet e ndërtimeve pa leje me funksion banimi, personi që posedon objektin përjashtohet nga pagesa e tarifës së shërbimit të legalizimit.
Përjashtimi lidhet me funksionin e ndërtesës. Për të përfituar, objekti duhet të jetë banesë dhe të përmbushë kushtet ligjore për t’u futur në procesin e legalizimit.
Vendimi ndryshon rregullat e mëparshme, duke e hequr tarifën si detyrim për poseduesit e banesave pa leje që trajtohen nga Agjencia Shtetërore e Kadastrës.
Qeveria ka përditësuar njëkohësisht edhe vendimin që përcakton tarifat, pagesat dhe penalitetet e proceseve kalimtare të pronësisë, duke reflektuar në të përjashtimin e ri.
Ndryshimi nuk do të thotë se çdo detyrim që lidhet me legalizimin falet automatikisht. Përjashtimi prek tarifën e shërbimit të legalizimit, ndërsa pagesat e mundshme për truallin ose detyrime të tjera shqyrtohen sipas situatës juridike të pronës.
Kjo procedurë është e ndryshme nga regjistrimi i objekteve pa titull pronësie, ku qytetari që aplikon vetë në e-Albania duhet të paguajë tarifën prej 10 mijë lekësh.
Për banesat pa leje, formulimi i vendimit parashikon përjashtimin e poseduesit nga tarifa e legalizimit, pa e lidhur atë vetëm me rastet kur procedura nis kryesisht nga Kadastra. /skyweb.al
