Greva e stafit të kabinës në Lufthansa po vazhdon të shkaktojë ndërprerje të mëdha në operimet e kompanisë ajrore, duke prekur mijëra pasagjerë në të gjithë Europën.
Vetëm gjatë ditës së sotme janë anuluar rreth 935 fluturime, që përbëjnë afro 82% të totalit.
Sipas informacioneve, situata nuk pritet të përmirësohet as nesër, pasi greva do të vijojë, ndërsa kompania po përballet me një valë të dytë protestash edhe nga pilotët.
Këta të fundit, pas grevës së zhvilluar në fillim të javës, kanë paralajmëruar rikthim të saj në ditët në vijim.
Në total, Lufthansa po anulon mesatarisht nga 850 deri në 950 fluturime në ditë gjatë kësaj jave, duke krijuar një situatë kaotike në aeroportet kryesore të Gjermanisë dhe më gjerë.
Pasagjerët këshillohen të verifikojnë statusin e fluturimeve përpara nisjes, ndërsa kompania nuk ka dhënë ende një afat të qartë për normalizimin e situatës. /skyweb.al
