Presidenti i Republikës, Bajram Begaj, ka dekretuar lirimin nga detyra të disa ambasadorëve të Republikës së Shqipërisë, si dhe emërime të reja në shërbimin diplomatik.
Sipas njoftimit zyrtar, nga detyra është liruar Riza Poda, Ambasador i Jashtëzakonshëm dhe Fuqiplotë në Republikën Popullore të Kinës, si dhe ambasador jo rezident në Bangladesh, Korenë e Veriut, Vietnam, Mongoli dhe Tajlandë.
Gjithashtu, është dekretuar lirimi i Z. Bardhyl Canaj, ambasador në Republikën e Serbisë, si dhe i Sami Shibës, ambasador në Republikën Arabe të Egjiptit dhe në disa vende të tjera si ambasador jo rezident, përfshirë Sirinë, Jordaninë, Libinë, Palestinën, Libanin dhe Sudanin.
Nga detyra është liruar edhe Vasilika Hysi, ambasadore në Misionin e Përhershëm të Shqipërisë pranë Zyrës së Kombeve të Bashkuara dhe organizatave të tjera ndërkombëtare në Gjenevë, si dhe Albana Dautllari, ambasadore në Mbretërinë e Belgjikës dhe në Luksemburg.
Në të njëjtën kohë, Presidenti ka dekretuar emërimin e Gazmend Barbullushit si Ambasador i Jashtëzakonshëm dhe Fuqiplotë në Mbretërinë e Belgjikës, si dhe ambasador jo rezident në Dukatin e Madh të Luksemburgut.
Po ashtu, Albana Dautllari është emëruar në detyrën e ambasadores në Misionin e Republikës së Shqipërisë pranë Bashkimit Evropian.
Këto ndryshime janë pjesë e riorganizimit të përfaqësimit diplomatik të Shqipërisë në disa prej posteve kryesore ndërkombëtare.
