Një nga historitë më të forta ekonomike në Europë lidhet me rritjen e shpejtë të industrisë së mbrojtjes, ku një emër i panjohur deri pak vite më parë është kthyer në miliarderin më të ri të kontinentit. Bëhet fjalë për Michal Strnad, drejtuesin 33-vjeçar të Czechoslovak Group (CSG), i cili sot konsiderohet njeriu më i pasur në Republikën Çeke.
Deri vonë, Strnad kishte mbajtur një profil të ulët publik, duke u fokusuar në drejtimin e kompanisë së themeluar nga babai i tij, ku ai punon që pas përfundimit të shkollës së mesme.
Por situata ndryshoi ndjeshëm pasi kompania doli në bursë në janar të këtij viti, me një vlerësim prej rreth 25 miliardë euro.
CSG është shndërruar në një nga gjigantët më të rinj të industrisë së mbrojtjes në Europë.
Kompania ka rreth 14 mijë punonjës dhe operon në më shumë se 30 fabrika në mbarë botën.
Vetëm gjatë vitit të kaluar, të ardhurat e saj arritën në 6.7 miliardë euro, një rritje e jashtëzakonshme krahasuar me vitin 2021, kur xhiroja ishte shumë më e ulët.
Pjesa dërrmuese e të ardhurave, rreth 80%, vjen nga sektori i mbrojtjes, duke e vendosur kompaninë mes dhjetë prodhuesve më të mëdhenj të armëve në Europë. Në veçanti, CSG është bërë prodhuesi i dytë më i madh i municioneve në kontinent, menjëherë pas kompanisë gjermane Rheinmetall.
Rritja e shpejtë e kompanisë lidhet drejtpërdrejt me rritjen e kërkesës për armatim në Europë, e nxitur nga konfliktet dhe tensionet gjeopolitike, veçanërisht lufta në Ukrainë.
Kjo ka sjellë një riorientim të industrisë dhe rritje të investimeve në sektorin e mbrojtjes.
Pavarësisht suksesit të arritur, Strnad ka sinjalizuar se planet për zgjerim nuk ndalen këtu.
Ai synon të forcojë më tej pozicionin e CSG në tregun europian dhe global, duke përfituar nga kërkesa në rritje për produkte të mbrojtjes. /skyweb.al
