Instituti Shqiptar i Medias, me mbështetjen e rrjetit ndërkombëtar IFEX (International Freedom of Expression Exchange), ka prezantuar për herë të parë Udhëzimet për Përdorimin Etik të Inteligjencës Artificiale në Median Shqiptare, një dokument që synon të ndihmojë redaksitë dhe gazetarët të përshtaten me epokën digjitale pa humbur integritetin profesional.
Udhëzimet janë hartuar nga një grup ekspertësh vendas dhe ndërkombëtarë, mes të cilëve Erlis Çela, Emirjon Senja si dhe Aidan White, ish-drejtor i Iniciativës për Gazetari Etike.
Projekti u realizua në kuadër të bashkëpunimit midis Institutit Shqiptar të Medias dhe IFEX, si përgjigje ndaj sfidave që po përballet gazetaria nga zhvillimi i shpejtë i inteligjencës artificiale.
Në dokument theksohet se AI po transformon mënyrën si prodhohen, shpërndahen dhe konsumohen lajmet, duke sjellë njëkohësisht mundësi për efikasitet dhe rreziqe për saktësinë, besueshmërinë dhe etikën profesionale.
Udhëzimet vendosin tre parime kryesore për përdorimin e përgjegjshëm të AI-së në media:
Mbikëqyrje njerëzore në çdo fazë të përdorimit të AI-së në përmbajtje;
Transparencë ndaj publikut, duke informuar kur materiali është gjeneruar ose ndihmuar nga AI;
Ruajtje e besimit publik dhe e integritetit profesional, duke siguruar që automatizimi të mos zëvendësojë kontrollin redaksional.
Dokumenti u hartua pas një procesi konsultimi me gazetarë, redaktorë, botues, përfaqësues të shoqërisë civile dhe ekspertë të teknologjisë.
Sipas Institutit Shqiptar të Medias, këto udhëzime përbëjnë hapin e parë drejt krijimit të një kornize etike kombëtare për përdorimin e inteligjencës artificiale në gazetari, në përputhje me praktikat më të mira ndërkombëtare.
GJEJINI UDHËZIMET KËTU
/skyweb.al
