Regjistrimi i automjeteve të reja në Shqipëri ka shënuar rritje gjatë periudhës janar-tetor 2026. Sipas të dhënave të Drejtorisë së Përgjithshme të Shërbimeve të Transportit Rrugor, në vend janë regjistruar për herë të parë 81.761 mjete, ku 79.3% e tyre janë autovetura.
Një rritje e ndjeshme është regjistruar edhe në segmentin e automjeteve elektrike. Në dhjetë muajt e parë të vitit janë regjistruar 8.891 mjete plotësisht elektrike, ose 93% më shumë krahasuar me të njëjtën periudhë të vitit 2025. Sipas DPSHTRR-së, përdorimi i tyre ka sjellë një reduktim të përllogaritur prej mbi 11.7 milionë kilogramësh dioksid karboni në vit.
Të dhënat tregojnë gjithashtu një tendencë drejt automjeteve më të reja dhe më pak ndotëse. Gjatë kësaj periudhe janë regjistruar mbi 21.500 automjete të moshës 0-4 vjeç, me rritje 31% krahasuar me një vit më parë. Ndërkohë, 83.3% e autoveturave të regjistruara plotësojnë standardin mjedisor Euro 5 e lart.
Edhe automjetet me zero kilometër po orientohen drejt teknologjive alternative, ku 73.1% e tyre janë elektrike, hibride ose Plug-in Hybrid.
Paralelisht me regjistrimet e reja, vijon edhe largimi i mjeteve të vjetra nga qarkullimi. Në periudhën janar-tetor janë çregjistruar përfundimisht 8.570 automjete, me një moshë mesatare prej 22 vitesh, shifër kjo 21.2% më e lartë se në vitin 2025.
Sa i përket origjinës së automjeteve, kryeson Koreja e Jugut me 26.3%, e ndjekur nga Kina me 16.2%, Gjermania me 12%, Italia me 11.4% dhe Shtetet e Bashkuara të Amerikës me 8.1%.
Shifrat pasqyrojnë një rinovim gradual të flotës së automjeteve në vend, me rritje të regjistrimeve të mjeteve të reja, zgjerim të përdorimit të teknologjive elektrike dhe hibride, si dhe largim të automjeteve të vjetra nga qarkullimi. /skyweb.al
