Dr. Ellen Foxman, profesoreshë e asociuar e mjekësisë laboratorike dhe imunobiologjisë në Shkollën e Mjekësisë të Universitetit Yale, u nxit drejt një zbulimi të rëndësishëm shkencor nga një përvojë personale: momenti i frikshëm kur djali i saj i vogël luftonte për të marrë frymë gjatë një sulmi astme, shkruan CNN.
Edhe pse ajo e dinte se djali kishte astmë dhe se infeksionet virale shpesh e përkeqësojnë gjendjen, pyetja kryesore mbeti: pse i njëjti virus shkakton pasoja kaq të ndryshme te njerëz të ndryshëm?
Rinovirusi, shkaktari më i shpeshtë i ftohjes së zakonshme, është gjithashtu shkaku kryesor i sulmeve të astmës. Ndërsa te shumë njerëz ai shkakton vetëm rrjedhje hundësh ose nuk jep fare simptoma, te të tjerë – veçanërisht personat me astmë – mund të çojë në vështirësi serioze në frymëmarrje, madje edhe në situata kërcënuese për jetën.
Sipas studimit të publikuar në janar në revistën shkencore Cell Press Blue, dallimi kryesor qëndron te shpejtësia dhe fuqia e reagimit fillestar të qelizave të hundës ndaj virusit. Ky reagim mbrojtës njihet si përgjigjja e interferonit, një mekanizëm i sistemit imunitar që ndihmon në ndalimin e përhapjes së virusit në trup.
Foxman dhe ekipi i saj rritën në laborator qeliza hunde të marra nga të rritur të shëndetshëm, derisa ato u zhvilluan në një ind të ngjashëm me atë të rrugëve të frymëmarrjes së njeriut. Më pas, qelizat u infektuan me rinovirus dhe u analizuan me teknika të avancuara që lejuan vëzhgimin e mijëra qelizave njëkohësisht.
Rezultatet treguan se kur përgjigjja e interferonit aktivizohej shpejt, më pak se 2% e qelizave infektoheshin, duke bërë që infeksioni të mbetej i lehtë ose pothuajse i padukshëm. Por kur studiuesit bllokuan qëllimisht këtë reagim, infeksioni u përhap ndjeshëm: rreth 30% e qelizave u prekën, duke shkaktuar prodhim të madh të mukusit dhe inflamacion, tipare këto të një ftohjeje të rëndë ose një sulmi astme.
“Është reagimi i trupit ai që përcakton sa e rëndë do të jetë sëmundja, jo vetëm vetë virusi,” thekson Foxman. Studimi hap rrugën për trajtime të reja që mund të forcojnë përgjigjen e hershme imunitare dhe të parandalojnë komplikacione serioze, veçanërisht te personat me astmë dhe sëmundje të tjera të frymëmarrjes.
