Ndalimi i përdorimit të rrjeteve sociale nga adoleshentët nën 16 vjeç në Australi është kundërshtuar në Gjykatën e Lartë të vendit nga platforma Reddit, e cila e ka cilësuar ligjin si të hartuar pa kujdes dhe si një kufizim të thellë të debatit politik.
Reddit dhe një organizatë që mbron liritë individuale i janë drejtuar gjykatës për të kundërshtuar legjislacionin, i cili hyri në fuqi në fund të vitit 2025. Ligji ndalon platformat e mëdha të rrjeteve sociale t’u lejojnë personave nën 16 vjeç të kenë llogari në këto shërbime.
Paditësit argumentojnë se ligji duhet të shpallet i pavlefshëm, pasi shkel lirinë e shprehur në mënyrë të nënkuptuar në Kushtetutën australiane për shprehjen politike. Reddit pretendon gjithashtu se ndalimi nuk duhet të zbatohet ndaj saj, pasi platforma nuk ka disa nga karakteristikat kryesore të rrjeteve sociale, siç është mbështetja te rrjetet e miqësisë.
Gjatë seancës në Gjykatën e Lartë, avokati i Reddit, Perry Herzfeld, deklaroi se ndalimi i llogarive për personat nën 16 vjeç i pengon ata të krijojnë dhe të reagojnë ndaj përmbajtjeve në një nga mjetet më të rëndësishme të komunikimit në botën moderne.
“Ky është një kufizim shumë i thellë i debatit politik në Australi”, u shpreh Herzfeld para trupës prej shtatë gjyqtarësh.
Ai tha se Reddit mbështet synimin e qeverisë për të minimizuar dëmet që mund të shkaktojnë rrjetet sociale, por sipas tij, ligji nuk e arrin këtë objektiv. Avokati e cilësoi legjislacionin si të hartuar keq dhe joefektiv, duke argumentuar se ai nuk përcakton masa konkrete për të penguar përdorimin nga të miturit dhe nuk përfshin shërbime të tjera online ku ndodh bullizmi kibernetik, si platformat e lojërave.
Sipas tij, edhe pse krijimi dhe komentimi i përmbajtjeve në rrjetet sociale zakonisht kërkon një llogari, një pjesë e madhe e materialeve mbetet e aksesueshme edhe për personat që nuk janë të regjistruar.
“Nëse qeveria federale shqetësohet për karakteristika të caktuara të rrjeteve sociale, atëherë duhet të rregullojë pikërisht këto karakteristika, gjë që nuk e ka bërë”, deklaroi Herzfeld.
Ndërkohë, që prej hyrjes në fuqi të ndalimit, disa studime, përfshirë edhe ato të kryera nga rregullatori australian eSafety Commissioner, kanë treguar se shumica e adoleshentëve nën moshën 16 vjeç vijojnë të përdorin rrjetet sociale.
Në përgjigje të mosrespektimit të ligjit, qeveria australiane ka dyfishuar gjobën maksimale për platformat që nuk zbatojnë detyrimet, duke e çuar atë në 99 milionë dollarë australianë, ose rreth 69.5 milionë dollarë amerikanë. Gjithashtu, rregullatorit i janë dhënë kompetenca më të zgjeruara për hetime dhe mbledhjen e provave, ndërsa qeveria ka bërë të ditur se po përgatit një proces gjyqësor ndaj disa prej platformave më të mëdha.
Qeveria australiane ka deklaruar se do ta mbrojë ligjin në gjykatë. Përfaqësuesja e saj ligjore, Joanna Davidson, argumentoi se fëmijët janë më të cenueshëm ndaj mekanizmave të varësisë që përdorin rrjetet sociale, pasi truri i tyre nuk është zhvilluar plotësisht.
Mbrojtja e qeverisë pritet të vijojë në seancën e së mërkurës.
Një vendim në favor të paditësve mund të ndikojë edhe në përpjekjet e vendeve të tjera për të vendosur kufizime të ngjashme. Britania dhe Malajzia janë ndër shtetet që po shqyrtojnë ose po zbatojnë masa për kufizimin e aksesit të të miturve në rrjetet sociale, me synimin për të mbrojtur shëndetin mendor dhe fizik të të rinjve./skyweb.al
