Banka e Shqipërisë ka ngritur shqetësimin për ndikimin e paketës së re fiskale të qeverisë mbi çmimet, duke e përfshirë atë mes pasigurive që rëndojnë mbi perspektivën ekonomike të vendit.
Në deklaratën e 3 nëntorit 2026, pas mbledhjes së Këshillit Mbikëqyrës, Banka paralajmëron se inflacioni pritet të rritet mbi objektivin prej 3% gjatë tremujorëve të ardhshëm, ndërsa ndikimi i ndryshimeve fiskale mbetet ende për t’u vlerësuar.
“Ndikimi në çmime i paketës së re fiskale mbetet për t’u vlerësuar në vijim”, thekson Banka e Shqipërisë.
Paralajmërimi vjen në një kohë kur qeveria ka propozuar rritjen e TVSH-së standarde nga 20% në 21%, rritjen e taksimit për sektorë të caktuar dhe ndryshime të tjera që prekin bizneset dhe konsumatorët.
Në vlerësimin e institucionit, pasiguritë për ekonominë janë shtuar, ndërsa rreziqet janë orientuar drejt një inflacioni më të lartë dhe një rritjeje ekonomike më të dobët sesa parashikimet.
Banka evidenton se çmimet e konsumit janë rritur me 3.2% gjatë tremujorit të tretë të vitit, nga 3% në tremujorin e dytë.
Rritja është nxitur kryesisht nga shtrenjtimi i karburanteve dhe disa produkteve ushqimore të papërpunuara.
Sipas Bankës, presionet inflacioniste që vijnë nga jashtë janë forcuar ndjeshëm, ndërsa mbiçmimi i lekut ka arritur të amortizojë vetëm pjesërisht ndikimin e tyre.
Në këto kushte, ndryshimet e parashikuara në paketën fiskale të vitit 2027 shtojnë një tjetër element pasigurie mbi ecurinë e çmimeve në tregun vendas.
Banka e Shqipërisë parashikon se inflacioni do të qëndrojë përkohësisht mbi objektiv dhe do të rikthehet pranë nivelit 3% gjatë vitit 2028.
Institucioni paralajmëron gjithashtu se tensionet e fundit sociale mund të ndikojnë negativisht konsumin, investimet dhe të ardhurat nga turizmi.
Megjithë shtimin e rreziqeve, Këshilli Mbikëqyrës vendosi të mbajë të pandryshuar normën bazë të interesit në nivelin 2.5%.
Banka thekson se vendimet e ardhshme të politikës monetare do të varen nga zhvillimet ekonomike, presionet inflacioniste dhe rreziqet që mund të pengojnë kthimin e qëndrueshëm të inflacionit në objektiv. /skyweb.al
