Carol Saffran filloi të përdorte Ozempic një vit më parë për të rregulluar nivelin e sheqerit në gjak, pasi mjekimet e mëparshme nuk kishin dhënë rezultat. Ajo ishte para-diabetike dhe mjeku ia rekomandoi këtë medikament për të shmangur kalimin në diabet të tipit 2. Sot është pranë peshës së saj ideale dhe pret një vizitë mjekësore për të vlerësuar përmirësimin e glukozës. Por pasi kaloi në dozën më të lartë të Ozempic, vuri re një ndryshim të padëshiruar: flokët e saj dukeshin më të rralluar.
“Kur krihja flokët, shihja më shumë fije se zakonisht,” tregon Saffran, 71 vjeçe, nga zona e Bostonit. “Nuk bien me tufë, por flokët duken më të hollë dhe jo aq të plotë sa më parë.”
Një vizitë te klinika e flokëve në Tufts Medical Center e çoi në diagnozën telogjen eflluvium, një gjendje e shoqëruar me rritje të rënies së flokëve që shfaqet si pasojë e stresit të trupit. Në rastin e saj, dermatologia Farah Moustafa shpjegoi se shkaku ishte humbja e shpejtë e peshës prej fillimit të trajtimit me Ozempic.
Ilaçet GLP-1, si Ozempic dhe Wegovy, janë bërë shumë të përhapura vitet e fundit. Një sondazh i fundit nga KFF tregoi se rreth një në tetë të rritur përdor një medikament të kësaj familjeje, qoftë për trajtim të sëmundjeve kronike, humbje peshe, ose të dyja. Por, si me çdo mjekim, efektet anësore mbeten për t’u marrë në konsideratë, dhe rënia e flokëve po përmendet gjithnjë e më shpesh nga përdoruesit, sidomos në grupet online.
Dermatologët e lidhin shpesh këtë gjendje me situata të caktuara stresuese: lindja e fëmijës, anestezia, dieta shumë e kufizuar, trauma fizike apo emocionale, si dhe humbja e shpejtë e peshës. Zakonisht, rënia e flokëve shfaqet tre deri në gjashtë muaj pas ngjarjes që e ka shkaktuar.
Sipas specialistëve, tek përdoruesit e GLP-1 shkaku kryesor nuk është vetë ilaçi, por ritmi i shpejtë i humbjes së peshës, shkruan CNN.
Mjekët vërejnë se disa pacientë të këtyre medikamenteve mund të futen në një gjendje të lehtë kequshqyerjeje, sepse mjekimi ul ndjeshëm oreksin. Kjo mund të çojë në mungesë të mikronutrientëve të nevojshëm për rritjen e shëndetshme të flokëve, si vitamina, minerale dhe veçanërisht proteina.
Disa specialistë e krahasojnë këtë dukuri me atë pas operacioneve bariatrike, kur pacientët shpesh përjetojnë rënie të përkohshme të flokëve për shkak të stresit metabolik dhe ndryshimeve të menjëhershme në ushqyerje. Edhe pse disa përdorues mendojnë se marrja e multivitaminave mund ta parandalojë fenomenin, deri tani nuk ka prova të forta shkencore që garanton parandalim të plotë.
Mjekët theksojnë se fenomeni po bëhet më i shpeshtë, sidomos tek ata që i përdorin medikamentet GLP-1 për humbje peshe estetike dhe që mund të mos marrin mjaftueshëm lëndë ushqyese. /Skyweb.al
