Porti i Durrësit mirëpriti sot për herë të parë kroçerën luksoze “Seven Seas Grandeur”, një nga anijet më prestigjioze në lundrimet, e cila mbërriti me 728 turistë në bord.
Turistët, që vijnë nga vende të ndryshme si SHBA, Kanada, Mbretëria e Bashkuar, Australia, Brazili, Gjermania, Spanja dhe Japonia, u ankoruan në kalatën nr. 5 të portit më të madh të vendit, duke shtuar një tjetër ndalesë të rëndësishme në itinerarin e tyre turistik.
Sipas Autoritetit Portual Durrës, ky vit ka shënuar një rritje të ndjeshme të vizitave me kroçera, duke sjellë mijëra turistë ndërkombëtarë në qytetin bregdetar dhe duke konfirmuar Durrësin si një nga pikat më tërheqëse të Mesdheut për lundrimet detare.
Prania e kroçerave gjatë muajve të vjeshtës thekson faktin se turizmi në Durrës po shtrihet përtej sezonit veror, duke promovuar Shqipërinë si një destinacion turistik gjatë gjithë vitit.
Pas ndalesës në Durrës, “Seven Seas Grandeur” do të vazhdojë lundrimin drejt Kotorrit, në Mal të Zi.
Kjo ndalesë simbolike në Durrës shënon mbylljen e sezonit të kroçerave për vitin 2025, një sezon që dëshmoi një interes në rritje për Shqipërinë në hartën ndërkombëtare të turizmit detar. /Skyweb.al
