Shoferët në Itali do të përballen me kosto më të larta për përdorimin e autostradave me pagesë duke filluar nga viti 2026.
Sipas një vendimi të Gjykatës Kushtetuese, tarifat për pothuajse të gjitha autostradat pritet të rriten mesatarisht me 1,5%. Ky vendim është kundërshtuar nga Ministria e Transportit.
Ministria bën me dije se rritja më e madhe, rreth 1,9%, do të zbatohet në aksin Salerno–Pompei–Napoli. Ndërkohë, në autostradën Brenner, e cila përdoret gjerësisht nga qytetarët e Italisë veriore, tarifat do të rriten me 1,46%.
Ministria e Transportit, e drejtuar nga zëvendëskryeministri Matteo Salvini, kreu i partisë së djathtë “Lega”, ka reaguar ashpër kundër këtyre rritjeve, duke i konsideruar të papërshtatshme për qytetarët.
Në Itali, çmimet e tarifave të autostradave përcaktohen përmes një sistemi kompleks, i bazuar në kontrata afatgjata mes shtetit dhe kompanive që administrojnë rrugët.
Një nga faktorët kryesorë të rritjes është inflacioni. Megjithatë, gjatë viteve të fundit disa rregullime tarifash janë shtyrë ose bllokuar. Salvini ka qenë një nga zërat kryesorë që ka mbështetur ngrirjen e çmimeve.
Në tetor, Gjykata Kushtetuese i shpalli këto përpjekje për ngrirje si jokushtetuese, duke hapur rrugën për rritjen e tarifave.
Autoriteti i Rregullimit të Transportit në Itali (ART) ka konfirmuar se përshtatja e tarifave me inflacionin do të jetë mesatarisht 1,5%. /skyweb.al
