Ergys Agasi nuk ishte ministër, as Kryeministër. Nuk drejtonte Policinë e Shtetit, SHISH-in apo AKSHI-n. Në letër, nuk kishte pushtet mbi asnjërin prej tyre. E megjithatë, sa më shumë po zgjerohet hetimi i SPAK, aq më shumë emra nga këto institucione dalin në të njëjtën dosje me të.
Ligjërisht, Policia e Shtetit dhe Shërbimi Informativ i Shtetit janë aty për të zbuluar dhe penguar krimin. Por, po të lexosh çfarë po del nga dosja AKSHI, shteti paska qenë i Gysit!
Gjithçka nisi me tenderët e teknologjisë së informacionit. Sipas dyshimeve të SPAK, garat në AKSHI paracaktoheshin pikërisht nga Ergys Agasi dhe Ermal Beqiri për kompani të caktuara. Në qendër të skemës shfaqen pikërisht dyshja në fjalë dhe kompanië “Soft & Solution”, EA Solution, First, Fastech, etj.
Sipas dosjes së SPAK, të hartuar nga prokurori Bledar Maksuti, nën akuazë janë edhe ish-drejtoresha e AKSHI-t, Mirlinda Karçanaj, dhe ish-zëvendësja e saj, Hava Delibashi, shumë biznesmenë dhe zyrtarë të tjerë, të cilët duket se nuk i shërbenin shtetit shqiptar, por shtetit të Gysit.
Por një tender i manipuluar, sado i rëndë, nuk e shpjegon i vetëm përmasën e kësaj dosjeje, e cila duket se shkon edhe përtej pengmarrjes së biznesmenit Gerond Meçe. Duket se ajo shkon deri në kupolen së Policisë së Shtetit.
Agasi u arrestua disa javë më parë së bashku me Uljan Shpatarakun, ish-zyrtar i lartë policie.
Në operacionin e sotëm ndërkohë arrestua edhe Fatjon Kalluçi, drejtues në Laboratorin Shkencor të Policisë, ndërsa SPAK kontrolloi banesën e ish-drejtorit të Përgjithshëm të Policisë së Shtetit, Ilir Proda.
Në Durrës u arrestua edhe biznesmeni Embro Sulejmani, për të cilin dyshohet se ka fshirë pamje të kamerave të sigurisë pas arrestimit të Agasit. Ndërkohë, kontrollet u shtrinë në ambiente të lidhura me klanin Troplini. Kjo lëvizje tregon se se hetimi nuk po qëndron më brenda mureve të AKSHI-t.
Dhe sikur kjo të mos mjaftonte, në dosje ka hyrë edhe drejtuesja e SHISH-it. Për Vlora Hysenin, Gjykata e Posaçme ka caktuar “arrest në shtëpi” dhe pezullim nga detyra, nën dyshimet për përkrahje të autorit të krimit dhe nxjerrje të sekretit.
Një tjetër sektor ku s’ka plasur ende skandal drejtësie, por (ende) vetëm sherre biznesmenësh, është ajo e manipulimit masiv të pronave gjatë digjitalizimit të Kadastrës, gjatë periudhës kur në krye të saj ishte Dallandyshe Bici, një tjetër emër i prezantuar nga mediat si “njeriu i Gysit”.
Agasi mund të rezultojë përgjegjës për një pjesë të akuzave, për të gjitha ose edhe për asnjërën. Këtë e vendos GJKKO-ja.
Ajo që nuk mund të lihet vetëm në dorë të një vendimi gjykate është përgjigjja se si një person pa post publik arriti të bëhej nyja rreth së cilës sot hetohen tenderë, biznesmenë, ish-policë dhe drejtuesit e institucioneve të sigurisë.
Kush ia dha këtë pushtet Ergys Agasit?!
