Rritja e kostos së jetesës po prek edhe jetën sentimentale, duke i shtyrë të rinjtë të dalin më rrallë dhe të zgjedhin mënyra më ekonomike për të kaluar kohë me partnerin.
Sipas një sondazhi të Bank of Montreal, kostoja mesatare e një takimi në SHBA ka arritur në 189 dollarë, ose rreth 162 euro, me një rritje prej 12.5% brenda një viti.
Amerikanët shpenzuan mesatarisht rreth 1,995 euro për takime gjatë vitit të fundit, ndërsa 47% vlerësojnë se daljet romantike nuk ia vlejnë më koston dhe mundimin.
Fenomeni është pagëzuar “date-flation”, ose inflacioni i takimeve, pasi faturës së restorantit i shtohen transporti, kujdesi personal dhe blerja e veshjeve apo aksesorëve.
Presioni financiar ka detyruar 50% të brezit Z dhe 40% të Millennials të reduktojnë shpenzimet ose numrin e takimeve.
Në vend të restoranteve dhe kinemave, shumë të rinj gatuajnë së bashku në shtëpi, shohin filma, organizojnë piknikë ose dalin për shëtitje me kafen e përgatitur vetë.
Kostoja ndryshon ndjeshëm sipas qytetit. Një takim ekonomik kushton rreth 170 euro në Zyrih, 140 euro në Oslo dhe 135 euro në Kopenhagë, ndërsa në Kajro dhe Bangalore rreth 36 euro.
Sondazhi tregon gjithashtu se 66% e amerikanëve flasin hapur me partnerin për financat dhe personat më transparentë priren të shpenzojnë më pak në takime.
Në fillim të një lidhjeje, 71% e burrave deklarojnë se paguajnë të gjithë faturën, ndërsa 52% e grave preferojnë ndarjen e saj. Pas konsolidimit të marrëdhënies, 65% e çifteve i ndajnë shpenzimet.
Restorantet e shtrenjta dhe koktejet luksoze nuk janë domosdoshmëri: kimia mes dy njerëzve nuk matet me euro, por me kohën dhe vëmendjen që i kushtojnë njëri-tjetrit. /skyweb.al
