Shqipëria është përfshirë në një paketë të veçantë turistike nga revista britanike “Cosmopolitan UK”, në bashkëpunim me kompaninë “Intrepid”. Udhëtimi pesëditor, i planifikuar nga 26 deri më 30 qershor 2027, do të përfshijë Tiranën, Beratin dhe Rivierën Shqiptare.
I konceptuar si një eksperiencë vetëm për vajza dhe gra, itinerari ndërthur kulturën, gastronominë, degustimin e verërave vendase, ekskursionet me varkë, plazhet dhe aktivitetet relaksuese.
Gjatë qëndrimit në Shqipëri, turistet do të eksplorojnë tregjet lokale të Tiranës, do të takojnë gra shqiptare të angazhuara në sipërmarrje, do të provojnë verërat vendase në një kantinë familjare në Berat dhe do të zbulojnë me varkë gjiret e plazhet e fshehura të Rivierës.
Programi përfshin gjithashtu joga në perëndim të diellit, ecje në natyrë dhe darka me gatime tradicionale shqiptare. Pjesëmarrëset do të shoqërohen nga një përfaqësuese e ekipit të “Cosmopolitan” dhe një guidë vendase.
Çmimi i paketës është 1,379 paund për person, bazuar në akomodimin në dhomë dyshe të përbashkët. Për një dhomë individuale aplikohet një pagesë shtesë prej 254 paundësh.
Në çmim përfshihen akomodimi, vaktet dhe aktivitetet e përcaktuara në program, ndërsa biletat e avionit nuk janë të përfshira.
Përmes kësaj pakete, Shqipëria promovohet si një destinacion veror që ofron shumë më tepër se pushimet tradicionale në plazh, duke ndërthurur natyrën, kulturën dhe eksperiencat autentike. /skyweb.al
















