Çmimet e referencës që përdoren nga doganat për zhdoganimin e automjeteve të përdorura janë rritur me 25%, duke sjellë kosto më të larta për qytetarët dhe bizneset që importojnë mjete nga tregjet europiane.
Rritja parashikohet në udhëzimin e ri të Ministrisë së Financave “Për disa shtesa dhe ndryshime në udhëzimin nr. 3, datë 23.1.2018, ‘Për vlerësimin e mallrave për qëllime doganore’”, i cili ka hyrë në fuqi pas botimit në Fletoren Zyrtare.
Sipas këtij udhëzimi, çmimet e referencës përdoren për zhdoganimin e automjeteve me vit prodhimi më të hershëm se viti i fundit i publikuar në buletinet zyrtare që përdorin doganat, si “Quattroroute”, “Tuttotrasporti”, “Schwackeliste” dhe të tjera, të cilat pasqyrojnë çmimet e shitjes në tregjet europiane.
Për automjetet me cilindratë nga 1400 deri në 1900 cc, pragu minimal i zhdoganimit rritet nga 200 mijë lekë në 250 mijë lekë.
Për cilindratë nga 1900 deri në 2500 cc, vlera minimale rritet nga 325 mijë lekë në 406 mijë lekë.
Për automjetet nga 2500 deri në 3000 cc, çmimi minimal i zhdoganimit shkon nga 400 mijë lekë në 500 mijë lekë.
Për kategorinë 3000 deri në 4500 cc, pragu minimal rritet nga 500 mijë lekë në 625 mijë lekë.
Ndërsa për automjetet mbi 4500 cc, vlera minimale mbetet e pandryshuar në 1 milion lekë.
Rritja 25% aplikohet edhe për çmimet e referencës për kamionçinat, furgonët dhe kamionët.
Për mjetet me kapacitet deri në 1.5 tonë, pragu minimal i zhdoganimit rritet nga 400 mijë lekë në 500 mijë lekë.
Për kapacitet nga 1.5 deri në 3.5 tonë, nga 600 mijë lekë në 750 mijë lekë.
Për kamionët nga 3.5 deri në 10 tonë, nga 850 mijë lekë në 1.062.500 lekë.
Për kapacitet nga 10 deri në 15 tonë, nga 1 milion lekë në 1.250.000 lekë.
Ndërsa për mjetet mbi 15 tonë, pragu minimal rritet nga 1.2 milion lekë në 1.5 milion lekë.
Sipas udhëzimit të ri, vlerësimi i automjeteve të përdorura nuk mund të jetë më i ulët se 80% e çmimit të pasqyruar në buletinet referuese, duke formalizuar rritjen e bazës mbi të cilën llogariten detyrimet doganore.
Ndryshimet hyjnë në fuqi menjëherë pas botimit në Fletoren Zyrtare dhe pritet të kenë ndikim të drejtpërdrejtë në koston finale të automjeteve të përdorura të importuara në Shqipëri. /skyweb.al
