Autoritetet shëndetësore evropiane kanë identifikuar petët e çastit me shije, “noodles”, si burimin më të mundshëm të një shpërthimi të salmonelës që ka sëmurur të paktën 106 persona në 14 vende.
Zyrtarët evropianë të sigurisë ushqimore dhe shëndetit publik kanë raportuar një shpërthim infeksionesh me salmonelë të lidhur me produkte petësh të shpejta me shije, që përfshin 106 raste të konfirmuara në 14 vende. Rastet janë kryesisht te fëmijët dhe të rinjtë, ndërsa të paktën 49 persona kanë kërkuar shtrim në spital, sipas Autoritetit Evropian të Sigurisë Ushqimore dhe Qendrës Evropiane për Parandalimin dhe Kontrollin e Sëmundjeve.
“Produktet e petëve me shije janë burimi më i mundshëm i një shpërthimi të vazhdueshëm shumë-shtetëror të infeksioneve, me prova që lidhin rastet me produkte nga e njëjta markë,” thanë agjencitë.
Autoritetet evropiane thanë se raste janë raportuar në Austri, Mbretërinë e Bashkuar, Çeki, Danimarkë, Estoni, Francë, Gjermani, Hungari, Letoni, Lituani, Holandë, Norvegji, Poloni dhe Suedi. Agjencitë shtuan se masat e marra të kontrollit, përfshirë tërheqjen nga tregu dhe rikthimin e produkteve në disa vende, “e ulin ndjeshëm mundësinë” e rasteve të reja të lidhura me këtë shpërthim.
Hetimet epidemiologjike kanë gjetur se rastet e raportuara në Danimarkë, Estoni, Gjermani, Letoni dhe Lituani lidhen me konsumimin e produkteve të petëve me shije nga e njëjta markë.
Nuk është specifikuar furnizuesi, por është thënë se rastet e lidhura me Salmonella Stanley dhe shtame të tjera lidhen me një prodhues në Ukrainë. “Reeva Foods” në një deklaratë javën e kaluar përmendi një “zbulim të dyshuar” të Salmonella Stanley në një seri të caktuar produktesh të saj të petëve të çastit të shpërndara në tregun baltik dhe të prodhuara nga “Euro Food Service”, një prodhues ukrainas i produkteve të Reeva.
Kompania tha se ka nisur një hetim të brendshëm dhe ka tërhequr produktet nga tregu. Ajo shtoi se ka ndërmarrë masa si teste laboratorike të pavarura, auditime rregullatore, monitorim të mjedisit dhe masa të tjera parandaluese.
“Siguria e konsumatorëve tanë është prioriteti ynë kryesor,” tha Reeva. Ajo shtoi se po bashkëpunon me autoritetet.
Simptomat e salmonelozës përfshijnë diarre, temperaturë, dhimbje stomaku, të përziera dhe të vjella, të cilat zakonisht zgjasin disa ditë.
Shumica e njerëzve shërohen brenda një jave, por infeksionet mund të jenë të rënda te fëmijët e vegjël, të moshuarit dhe personat me sistem imunitar më të dobët.
