Shqiptarët kanë të ardhura shumë më të ulëta se qytetarët e Bashkimit Europian, por sot paguajnë më shumë se ata për ushqimet. Të dhënat për vitin 2025 tregojnë se niveli i çmimeve të ushqimeve në Shqipëri arriti në 102.9% të mesatares së BE-së.
Kjo do të thotë se një shportë ushqimore që kushton mesatarisht 100 euro në vendet e Bashkimit Europian, në Shqipëri kushton rreth 103 euro.
Ndërkohë, konsumi real për frymë i shqiptarëve ishte vetëm 48% e mesatares europiane, ndërsa PBB-ja për frymë vetëm 43%.
Kontrasti është thelluar me shpejtësi. Në vitin 2016, çmimet e ushqimeve në Shqipëri ishin sa 66% e mesatares së BE-së. Brenda nëntë vjetësh ato jo vetëm u barazuan, por e kaluan nivelin europian, shkruan Monitor. Në të njëjtën periudhë, fuqia reale e konsumit u përmirësua me vetëm 11 pikë përqindjeje.
Shqipëria është i vetmi vend i Ballkanit Perëndimor ku ushqimet kushtojnë më shumë se mesatarja e BE-së. Në vitin 2025, Serbia ishte në nivelin 96.6%, Mali i Zi dhe Bosnjë-Hercegovina në 84.6%, ndërsa Maqedonia e Veriut në 74.3%.
Shtrenjtimi vazhdoi edhe gjatë vitit 2026. Në korrik, çmimet e ushqimeve dhe pijeve joalkoolike në Shqipëri u rritën me 3.2% krahasuar me një vit më parë, pesë herë më shpejt se mesatarja e BE-së prej 0.6%. Në Serbi dhe Maqedoninë e Veriut, ndërkohë, ushqimet u liruan.
Edhe rritja e të ardhurave për frymë duhet lexuar me kujdes, pasi një pjesë lidhet me tkurrjen e popullsisë pas Censit 2023. Kur e njëjta ekonomi pjesëtohet mes më pak banorëve, treguesit për frymë rriten automatikisht, pa nënkuptuar domosdoshmërisht se familjet janë bërë po aq më të pasura.
Në praktikë, Shqipëria i është afruar Europës shumë më shpejt në çmime sesa në paga dhe mirëqenie. Shqiptarët vazhdojnë të fitojnë më pak se gjysma e mesatares europiane, por për ushqimet paguajnë tashmë më shumë.
