Shqipëria vijon të tërheqë vëmendjen e turistëve të huaj, të cilët krahas plazheve me ujëra të kristalta po zbulojnë edhe pasurinë historike, kulturore dhe natyrore të vendit.
Një nga këta turistë ishte gazetari britanik Nigel Thompson, i cili udhëtoi nga Korfuzi drejt jugut të Shqipërisë për një ekskursion njëditor, përvojë të cilën e ka rrëfyer në një artikull të publikuar nga e përditshmja britanike “The Sun”.
Me titullin “Vizitova ‘Maldivet e Evropës’ për 77 paund”, artikulli përshkruan një ditë të gjatë udhëtimi, gjatë së cilës Thompson vizitoi disa prej pikave më të njohura të jugut shqiptar, mes tyre Sarandën, Butrintin dhe Kalanë e Lëkurësit.
Gazetari tregon se prej kohësh kishte dëgjuar për bregdetin shqiptar dhe ujërat e tij në ngjyrë bruz, që shpesh kanë bërë që Shqipëria të cilësohet si “Maldivet e Evropës”. Por udhëtimi i tij i tregoi se vendi ofron shumë më tepër sesa plazhe dhe det.
Ekskursioni nisi herët në mëngjes, rreth orës 7:30, me një udhëtim rreth 30-minutësh me autobus drejt portit, ku grupi mori tragetin për në Sarandë. Pas rreth 75 minutash lundrim, turistët mbërritën në qytetin bregdetar dhe vijuan udhëtimin me autobus drejt destinacioneve kryesore.
Pas një ndalese të shkurtër për kafe, grupi u nis drejt Butrintit, një prej vendeve më të rëndësishme arkeologjike të Shqipërisë. I rrethuar nga natyra e Parkut Kombëtar të Butrintit, siti ruan gjurmë të një historie mijëravjeçare dhe është pjesë e Trashëgimisë Botërore të UNESCO-s.
Thompson rrëfen se, ndonëse kishte dëgjuar më parë për liqenin e Butrintit, nuk e kishte imagjinuar historinë e gjatë të këtij qyteti antik. Gjatë vizitës, ai u njoh me gjurmët e një qytetërimi që daton që prej lashtësisë, me periudha të rëndësishme greke dhe romake.
Nën drejtimin e udhërrëfyeses Lindita, gazetari vizitoi disa prej monumenteve kryesore të Butrintit, përfshirë forumin, teatrin antik, banjat publike, ujësjellësin dhe muret rrethuese. Këto të fundit shtrihen për rreth 975 metra dhe në disa pjesë arrijnë deri në 7 metra lartësi.
Vizita zhvillohet nëpër shtigje pyjore dhe terren të pabarabartë, me disa pjesë me shkallë, ndaj Thompson këshillon vizitorët të zgjedhin këpucë të përshtatshme për ecje.
Përveç historisë, udhëtimi i dha gazetarit mundësinë të njihte edhe natyrën e veçantë të zonës. Ai mësoi se “liqeni” i Butrintit është në fakt një lagunë e lidhur me detin përmes një kanali rreth 2,6 kilometra të gjatë.
Zona përreth karakterizohet nga biodiversiteti i pasur dhe prania e shumë llojeve të shpendëve, ndërsa laguna njihet edhe për prodhimin e midhjeve.
Para nisjes për t’u kthyer në Korfuz, grupi bëri një ndalesë në Kalanë e Lëkurësit. E vendosur në një kodër rreth 245 metra mbi nivelin e detit, kalaja ofron pamje panoramike mbi Sarandën, detin dhe vijën bregdetare përreth.
Dita përfundoi me pak kohë të lirë në një bar buzë detit, ku Thompson pati mundësinë të shijonte edhe një birrë shqiptare përpara se të niste udhëtimin e kthimit.
Gazetari pranon se ekskursioni ishte i gjatë, duke zgjatur më shumë se 12 orë, ndërsa kthimi në hotel në Korfuz mori edhe më shumë kohë për shkak të ndalesave për pasagjerët e tjerë.
Megjithatë, në përfundim të përvojës së tij, Thompson e përshkruan udhëtimin si një mënyrë interesante për të zbuluar Shqipërinë përtej imazhit të saj si destinacion plazhi. Ai shprehet se pas kësaj vizite do ta konsideronte edhe një qëndrim më të gjatë në vend.
Sipas “The Sun”, ekskursioni njëditor nga Korfuzi drejt jugut të Shqipërisë kushtonte 77 paund për person.
