Shqipëria është destinacioni sekret i edicionit të radhës të nismës “Let’s Get Lost”, ku 150 influencues dhe gazetarë nga Varshava kanë mbërritur në Tiranë.
Pjesëmarrësit u nisën pa e ditur destinacionin e udhëtimit dhe vetëm pas mbërritjes zbuluan se aventura e tyre do të zhvillohej në Shqipëri.
Gjatë katër ditëve, ata do të njohin nga afër kulturën, historinë, kuzhinën, natyrën dhe mikpritjen shqiptare.
Përvojat e tyre pritet të ndahen me ndjekësit dhe lexuesit përmes rrjeteve sociale, si dhe mediave tradicionale.
Me mbështetjen e Aeroportit Ndërkombëtar të Tiranës, kjo nismë synon ta prezantojë Shqipërinë te publiku polak dhe të rrisë interesin për vendin si destinacion turistik.
Manjola Kaso, Drejtore e Zhvillimit të Biznesit të Aviacionit dhe Marketingut në Aeroportin Ndërkombëtar të Tiranës, u shpreh se prania e gazetarëve dhe influencuesve nga Polonia është një mundësi për t’ua treguar audiencave të reja Shqipërinë përmes përvojave të drejtpërdrejta.
“Shpresojmë që kjo aventurë t’u japë pjesëmarrësve një njohje të veçantë të vendit tonë dhe të përcjellë më tej bukuritë, kulturën dhe mikpritjen shqiptare”, tha Kaso. /skyweb.al
