Kuvendi i Shqipërisë ka nisur shqyrtimin nen për nen të projektbuxhetit 2026 dhe projektligjeve të paketës fiskale, me synimin që dokumentet të marrin miratimin përfundimtar dhe të hyjnë në fuqi në fillim të vitit të ardhshëm.
Buxheti i vitit 2026 kap vlerën rekord prej 887 miliardë lekësh, rreth 8.9 miliardë euro, duke u bërë buxheti më i lartë i akorduar ndonjëherë. Sektori i shëndetësisë, mbrojtjes sociale, infrastruktura, energjia, arsimi dhe ushtria mbeten prioritetet kryesore të financimit për vitin e ardhshëm, sipas dokumentit zyrtar.
Të ardhurat e planifikuara parashikohen të arrijnë në 823 miliardë lekë, ose rreth 8.3 miliardë euro, ndërsa deficiti buxhetor llogaritet në 63 miliardë lekë, duke reflektuar një politikë fiskale të zgjeruar për përballimin e angazhimeve sociale dhe investimeve publike.
Një peshë të madhe në projektbuxhet zë politika sociale, ku qeveria parashikon rritje të ndjeshme të shpenzimeve. Për vitin 2026, rreth 100 milionë euro do të përdoren për rritjen e pensioneve sipas skemës së re, ndërsa 135 milionë euro janë parashikuar për rimbursimin e medikamenteve, një mbështetje shtesë për shtresat më të prekura.
Pjesë e diskutimit janë edhe ligjet fiskale që hyjnë në fuqi nga 1 janari 2026. Ndryshimet përfshijnë rivlerësimin e pasurive me normë tatimore 5 për qind dhe paketën e paqes fiskale, e cila parashikon shuarjen e detyrimeve të vjetra të biznesit sipas disa skemave, si dhe mundësinë e pagesës me këste për detyrimet më të reja. Gjithashtu, fermerët do të përfitojnë rimbursim të TVSH-së në masën 10 për qind për totalin e faturave nga shitjet e prodhimeve tek grumbulluesit.
Paketa përfshin edhe ndryshime në sistemin e taksave vendore dhe ligjin për tatimin mbi të ardhurat, duke synuar harmonizimin e praktikave fiskale dhe rritjen e qëndrueshmërisë së financave publike.
