Operacionet kirurgjikale që sot konsiderohen rutinë, madje edhe lindja e një fëmije, mund të shndërrohen në procedura me rrezik të lartë për jetën për shkak të rezistencës në rritje ndaj antibiotikëve.
Paralajmërimi vjen nga Organizata Botërore e Shëndetësisë (OBSH), e cila e konsideron rezistencën antimikrobike një nga kërcënimet më serioze për të ardhmen e mjekësisë moderne.
Problemi lidhet me aftësinë e baktereve dhe mikroorganizmave të tjerë për t’u bërë rezistentë ndaj barnave që përdoren për trajtimin e infeksioneve. Kjo bën që trajtime dikur të efektshme të mos japin më rezultat.
Jean Pierre Nyemazi, specialist i OBSH-së, paralajmëroi se fenomeni është përhapur në përmasa shqetësuese dhe po rrezikon arritjet e mjekësisë moderne.
Pasojat mund të jenë veçanërisht të rënda për pacientët që i nënshtrohen ndërhyrjeve kirurgjikale, personat me kancer dhe ata që vuajnë nga sëmundje kronike. Në këto raste, infeksionet që nuk reagojnë ndaj trajtimit mund të shkaktojnë komplikacione serioze, deri në humbjen e jetës.
Shifrat e publikuara nga OBSH-ja tregojnë përmasat e problemit.
Vetëm gjatë vitit 2021, më shumë se një milion njerëz vlerësohet se humbën jetën si pasojë e drejtpërdrejtë e rezistencës antimikrobike.
Nëse situata vazhdon me të njëjtat tendenca, modelet parashikuese tregojnë se rezistenca ndaj barnave mund të shkaktojë rreth 39 milionë vdekje në mbarë botën gjatë 25 viteve.
Një nga shqetësimet kryesore është se bakteret po zhvillojnë rezistencë ndaj antibiotikëve të përdorur gjerësisht, ndërkohë që zhvillimi i barnave të reja nuk po ecën me ritmin e nevojshëm për të përballuar këtë kërcënim.
OBSH-ja thekson se parandalimi i infeksioneve dhe përdorimi i përgjegjshëm i antibiotikëve janë ndër masat më të rëndësishme për kufizimin e fenomenit.
Megjithatë, vetëm pak më shumë se një e treta e vendeve kanë zbatuar plotësisht udhëzimet ndërkombëtare për parandalimin e infeksioneve në nivel kombëtar.
Në prag të Javës Botërore të Ndërgjegjësimit për Rezistencën Antimikrobike, që zhvillohet nga 18 deri më 24 nëntor, OBSH-ja u ka bërë thirrje qeverive të përshpejtojnë masat parandaluese dhe të forcojnë sistemet e monitorimit.
Organizata paralajmëron se shumë vende janë ende larg objektivave të miratuara në vitin 2024, të cilat synojnë përmirësimin e parandalimit të infeksioneve, përdorimit të barnave, diagnostikimit dhe mbikëqyrjes së rezistencës deri në vitin 2030.















