Banka digjitale Revolut është vendosur nën administrim gjyqësor për një vit në Itali, pas një hetimi që ka zbuluar mangësi serioze në sistemin e kontrollit kundër pastrimit të parave, të cilat dyshohet se kanë lehtësuar lëvizjen dhe fshehjen e miliona eurove nga persona të lidhur me aktivitete kriminale dhe organizata mafioze.
Vendimi është marrë më 16 nëntor nga Gjykata e Milanos, me kërkesë të prokurorit Paolo Storari, pas hetimeve të kryera nga Guardia di Finanza.
Sipas Prokurorisë së Milanos, dobësitë në mekanizmat e kontrollit të Revolut kanë mundësuar kryerjen e operacioneve financiare me vlerë 76.5 milionë euro, të cilat mund të ishin identifikuar nëse banka do të kishte zbatuar siç duhet detyrimet ligjore kundër pastrimit të parave.
Hetuesit kanë identifikuar mes klientëve të bankës persona të dënuar ose nën hetim për pastrim parash, transferim të paligjshëm të pasurive dhe vepra të tjera të rënda penale, përfshirë raste që lidhen me veprimtarinë mafioze.
Në dokumentacion përmenden edhe lëvizje financiare të shoqërive të lidhura me persona të afërt me klanin Farao-Marincola të organizatës mafioze kalabreze ‘Ndrangheta.
Një nga gjetjet më të rëndësishme lidhet me 24 klientë të identifikuar gjatë hetimeve, të cilët rezultonin të përfshirë në procedime penale.
Pavarësisht profilit të tyre, banka nuk kishte dërguar asnjë raportim për transaksione të dyshimta lidhur me këta persona, ndërkohë që institucione të tjera financiare kishin paraqitur 265 raportime.
Sipas vendimit gjyqësor prej 39 faqesh, mangësitë në sistemin e kontrollit kishin mundësuar fshehjen e flukseve financiare prej 41.9 milionë eurosh gjatë periudhës 2021–2026.
Hetimet kanë zbuluar gjithashtu probleme të konsiderueshme në verifikimin e identitetit të klientëve, monitorimin e transaksioneve dhe kontrollin e operacioneve që lidhen me kriptomonedhat.
Një inspektim i mëparshëm ndaj një operatori të kriptoaseteve të grupit Revolut kishte evidentuar mbi një milion shkelje të dyshuara të detyrimeve për verifikimin e klientëve dhe ruajtjen e të dhënave, si edhe 60 raste të mosraportimit të operacioneve të dyshimta.
Prokuroria vlerëson se problemet nuk kanë qenë të izoluara, por kanë vazhduar për disa vite, duke krijuar mundësi që persona të përfshirë në aktivitete kriminale të përdornin infrastrukturën financiare të bankës.
Për këtë arsye, gjykata ka urdhëruar administrimin gjyqësor të operacioneve italiane të Revolut për një periudhë njëvjeçare, me qëllim përmirësimin e sistemeve të kontrollit dhe parandalimin e rasteve të ngjashme.
Dy administratorë të caktuar nga gjykata do të mbikëqyrin zbatimin e një programi me 15 masa për forcimin e procedurave kundër pastrimit të parave.
Megjithatë, masa nuk përbën një dënim penal ndaj Revolut. Vetë banka nuk është nën hetim penal në këtë çështje dhe administrimi gjyqësor ka karakter parandalues.
Në reagimin e saj, Revolut ka deklaruar se do të bashkëpunojë plotësisht me autoritetet italiane për zbatimin e vendimit.
Banka ka siguruar gjithashtu klientët se shërbimet për individët dhe bizneset në Itali vijojnë normalisht, pa ndërprerje.
Vendimi prek vetëm veprimtarinë italiane të Revolut dhe nuk nënkupton pezullimin e aktivitetit të bankës në vendet e tjera ku ajo operon.
















