Drejtuesi i SPAK, Klodian Braho, ka bërë një deklaratë të fortë në Kuvend, teksa u pyet për arrestimin e kryer këtë javë nga Byroja Kombëtare e Hetimit pa ndihmën e Policisë së Shtetit.
Ky ishte rasti i parë kur BKH ekzekutoi vetë një arrestim, duke hapur debat mbi marrëdhënien e besimit mes SPAK dhe Policisë.
Braho tha se SPAK ka vlerësim për shumicën e efektivëve të Policisë së Shtetit, por shtoi se jo të gjithë janë njësoj.
“Gjatë vitit 2025, Policia rriti referimet në SPAK. Kemi vlerësimin më të madh për shumicën e Policisë së Shtetit. Si në çdo institucion tjetër, jo të gjithë janë një lloj. Ndonjëri ka ose mund të ketë probleme me ligjin”, u shpreh Braho.
Sipas tij, Policia e Shtetit mbetet partneri kryesor i SPAK, por Prokuroria e Posaçme pret më shumë nga ky institucion.
Braho theksoi se veprimet e kryera nga BKH për arrestime janë të lejuara nga ligji dhe se SPAK duhet të ketë pavarësi operacionale.
“SPAK duhet të ketë pavarësi operacionale, nuk mund të varet nga institucione të tjera”, tha ai.
Ai pranoi se në disa raste pengesat lidhen me mungesën e infrastrukturës operacionale dhe teknike të vetë SPAK dhe BKH.
“Ne nuk e zëvendësojmë dot Policinë e Shtetit, por duhet të jemi të pavarur të bëjmë të gjithë ciklin e veprimeve të nevojshme procedurale”, deklaroi Braho.
Deklarata vjen pas precedentit të kësaj jave, kur BKH kreu vetë një arrestim, duke sinjalizuar se SPAK kërkon të mos varet më plotësisht nga Policia për ekzekutimin e urdhrave në çështje të ndjeshme. /skyweb.al
