Evropa dhe Azia Qendrore janë të vetmet rajone në botë që nuk kanë arritur objektivat e Organizatës Botërore të Shëndetësisë (OBSH) për uljen e përdorimit të duhanit te gratë. Sipas raportit të ri të OBSH-së, rreth 63 milionë gra në rajon përdorin duhan, ndërsa në 15 vende është shënuar rritje e konsumit.
Të dhënat tregojnë se nga viti 2010 deri në vitin 2025, përdorimi i duhanit te burrat ra me 23%, nga 39.3% në 30.3%. Ndërsa te gratë, rënia ishte vetëm 12%, nga 19.6% në 17.3%.
Në nivel global, përdorimi i duhanit te gratë u ul me 42% gjatë së njëjtës periudhë. Ndërkohë, në Rajonin Evropian të OBSH-së, ku përfshihen 53 vende të Evropës dhe Azisë Qendrore, më shumë se 22% e të rriturve përdorin duhan. Konsumi i tij shkakton rreth 1.6 milionë vdekje çdo vit në këtë rajon.
Shqetësuese janë edhe të dhënat për të rinjtë. Rreth 14% e adoleshentëve të moshës 13–15 vjeç përdorin cigare elektronike, pothuajse dyfishi i mesatares globale. Në 29 vende, vajzat kanë të njëjtën mundësi ose më shumë gjasa se djemtë të përdorin duhan, ndërsa në 35 vende kjo vlen edhe për përdorimin e cigareve elektronike.
“Vajzat adoleshente tashmë pinë cigare dhe përdorin cigare elektronike po aq sa djemtë, ose edhe më shumë”, deklaroi Kristina Mauer-Stender, këshilltare rajonale e OBSH-së për kontrollin e duhanit.
OBSH u ka bërë thirrje vendeve të rrisin taksat mbi produktet e duhanit në të paktën 75% të çmimit të shitjes, të zbatojnë politika për ambientet pa tym duhani, të ndalojnë reklamimin dhe të forcojnë rregullimin e cigareve elektronike.
Ndërkohë, Komisioni Evropian po përgatit një rishikim të gjerë të legjislacionit për duhanin, që pritet të përfshijë edhe produktet e reja të nikotinës, si cigaret elektronike dhe qeskat e nikotinës. Një plan i veçantë për rritjen e taksave të duhanit, megjithatë, ka mbetur pezull.
Raporti ngre gjithashtu shqetësime për ndikimin e industrisë së duhanit në proceset vendimmarrëse evropiane. Sipas vlerësimeve, kjo industri shpenzon nga 8 deri në 10 milionë euro çdo vit për lobim në institucionet e Bashkimit Evropian. /skyweb.al















