Gazetari Ardit Rada ka komentuar ndryshimet e fundit në qeveri, ku u zëvendësua afro gjysma e kabinetit, duke u ndalur veçanërisht te largimi i Elisa Spiropalit nga posti. Sipas tij, sinjalet për këtë lëvizje ishin dhënë më herët nga vetë kryeministri Edi Rama.
Rada u shpreh se momenti kur Rama mori me vete ministrin Ervin Demo në aktivitetin e Bordit të Paqes në SHBA, ishte një tregues se Spiropali pritej të largohej nga detyra.
Ai theksoi se zakonisht në këto raste përfaqësimi do t’i takonte ministres së Jashtme, ndërsa zgjedhja e një ministri tjetër tregonte ndryshime të pritshme në kabinet.
Sipas gazetarit, largimi i Spiropalit nuk lidhet me përplasjet e përfolura në media me Belinda Ballukun, ndërsa emërimi i Ferit Hoxhës në krye të diplomacisë shihet prej tij si një përmirësim për Ministrinë e Jashtme.
Rada shtoi se takimet e shumta të Spiropalit në Kosovë u interpretuan si një përpjekje për të rritur profilin e saj politik, gjë që sipas tij u pasua nga reagimi i kryeministrit.
Ai theksoi në A2 se konkurrenca brenda qeverisë është e ndjeshme dhe se, sipas vlerësimit të tij, Spiropali tentoi të spikaste më shumë se disa ministra të tjerë, çka mund të ketë ndikuar në vendimin për zëvendësimin e saj.
