Ferrari ka vendosur një rekord të ri në tregun e makinave luksoze, pasi modeli i saj i parë plotësisht elektrik, Luce, është shitur për 40 milionë dollarë në një ankand bamirësie të Sotheby’s në Kaliforni.
Shuma e paguar e bën këtë Ferrari të personalizuar makinën e re më të shtrenjtë të shitur ndonjëherë në ankand, duke tejkaluar ndjeshëm rekordin e mëparshëm të vendosur vetëm një vit më parë.
Rekordi mbahej nga një Ferrari Daytona SP3 i personalizuar, i cili ishte shitur për rreth 26 milionë dollarë. Ankandi i Luce u zhvillua në kuadër të Monterey Car Week, një prej ngjarjeve më të rëndësishme botërore për makinat luksoze dhe ato të koleksionit.
Rezultati është veçanërisht domethënës për Ferrari-n, pasi Luce përfaqëson një ndryshim të madh nga tradita e prodhuesit italian, të ndërtuar për dekada mbi motorët e fuqishëm me djegie të brendshme.
Modeli u prezantua në maj me një çmim fillestar prej rreth 550 mijë eurosh, ose mbi 630 mijë dollarë. Prezantimi i makinës së parë elektrike të kompanisë u shoqërua edhe me kritika, ndërsa aksionet e Ferrari-t regjistruan rënie në atë periudhë.
Luce është zhvilluar në bashkëpunim me LoveFrom, studion e themeluar nga Jony Ive, ish-drejtuesi i dizajnit në Apple dhe një prej njerëzve kryesorë pas produkteve ikonike si iPhone dhe iMac.
Ferrari elektrik ka një konfigurim me katër dyer dhe zhvillon më shumë se 1,000 kuaj fuqi, ndërsa kompania synon të ruajë karakteristikat e performancës dhe ekskluzivitetit që kanë përcaktuar historikisht markën.
Drejtori ekzekutiv i Ferrari-t, Benedetto Vigna, deklaroi gjatë prezantimit në maj se kompania po merr porosi për modelin si nga klientët ekzistues, ashtu edhe nga blerës të rinj.
Sipas Bloomberg, Ferrari ka rritur gjithashtu parashikimet financiare vjetore, e mbështetur nga kërkesa e fortë për modelet me prodhim të kufizuar, përfshirë F80, si dhe versionet më të shtrenjta të modelit me katër vende Purosangue.
Shitja e Luce për 40 milionë dollarë tregon se, të paktën në segmentin më ekskluziv të tregut, kalimi i Ferrari-t drejt teknologjisë elektrike mund të krijojë interes të madh mes koleksionistëve, pavarësisht debatit që shoqëroi prezantimin e modelit. /skyweb.al
