Ministria e Financave zhvilloi sot një takim konsultativ me grupet e interesit për projektligjin “Për sigurimin e detyrueshëm të banesave nga tërmetet”, një nismë që synon të krijojë një mekanizëm të qëndrueshëm financiar për mbrojtjen e qytetarëve nga pasojat e fatkeqësive natyrore.
Takimi u drejtua nga ministri i Financave, Petrit Malaj, i cili theksoi rëndësinë e konsultimit publik dhe bashkëpunimit me institucionet ndërkombëtare. Ai bëri të ditur se drafti është përgatitur në bashkëpunim me Bankën Botërore, duke u mbështetur në përvojat më të mira të vendeve me rrezik të lartë sizmik.
Ministri kujtoi dëmet e mëdha që i shkaktoi vendit tërmeti i 26 nëntorit 2019, me kosto të drejtpërdrejtë rreth 7.5 për qind të Prodhimit të Brendshëm Bruto. “Tërmetet nuk mund të parashikohen, por mund të përgatitemi për të zbutur pasojat e tyre. Ky kuadër ligjor do të garantojë kompensim të shpejtë dhe efikas për dëmet e banesave dhe do të forcojë stabilitetin financiar të familjeve shqiptare,” u shpreh Malaj.
Ai shtoi se në hartimin e projektligjit janë ndjekur modele të suksesshme nga vende si Turqia dhe Rumania, me synimin për të reduktuar kostot ekonomike dhe fiskale që sjellin katastrofat natyrore. Sipas ministrit, zbatimi i ligjit pritet të rrisë mbulimin e sigurimeve të banesave dhe të përmirësojë sistemin e menaxhimit të riskut në Shqipëri.
Një element qendror i nismës është krijimi i Fondit Kombëtar për Tërmetet, i cili do të shërbejë si instrument për mbrojtjen afatgjatë të investimeve dhe mirëqenies së qytetarëve.
Ministri Malaj siguroi se procesi i konsultimeve do të vijojë me të gjitha palët e interesuara, për të reflektuar nevojat reale të qytetarëve dhe për të ndërtuar një sistem sigurimesh të drejtë dhe të besueshëm.
Projektligji “Për sigurimin e detyrueshëm të banesave nga tërmetet” është publikuar për konsultim në Regjistrin Elektronik të Njoftimeve dhe Konsultimeve Publike që prej muajit korrik 2025. /skyweb.al
