Griselda Doksani dheRonaldo Lika, janë dy inspektorët e AKU-së që lejuan eksportimin e rreth 8 ton domate me pesticide nga Shqipëria drejt Kroacisë.
Ronaldo Lika, 27 vjeç, banues në Tiranë dhe Griselda Doksani, 25 vjeçe, banuese në Berat, u arrestuan nga policia me urdhër të Prokurorisë së Beratit.
Nga hetimet ka rezultuar se pasi kanë kryer kontrolle në subjektin që tregtonte perimet, praktikat e mbajtura kanë rezultuar të plotësuara në mënyrë fiktive, duke mos bërë marrjen e mostrave të domateve që ndodheshin në magazinë dhe bllokimin e tyre.
Po ashtu, sipas policisë, inspektorët kanë marrë si të rregullta faturat fiktive të blerjeve nga administratori, duke tjetërsuar në këtë mënyrë faktet në lidhje me produktet e konstatuara me nivele të larta preparati.
Kujtojmë se nga policia u arrestua edhe administratori i firmës, shtetasi Mariglen Qorri, 40 vjeç, i cili kishte prodhuar dhe më pas kishte eksportuar drejt shtetit Kroat, 8 tonë domate të cilat pas analizave të kryera kishin rezultuar me përbërje të lartë të preparatit “Chlorefenapyr”, dhe ishin asgjësuar nga autoritetet kroate. /skyweb.al
