Nëpunësit civilë dhe punonjës të tjerë të administratës publike do të kenë edhe këtë vit mundësi të aplikojnë për kredi të buta me interes zero.
Sipas vendimit të publikuar në Fletoren Zyrtare, kuotat e përgjithshme për kreditë e lehtësuara janë 300 dhe do të shpërndahen mes disa kategorive të administratës publike.
Nga këto, 70 kuota janë parashikuar për Ministrinë e Shëndetësisë dhe Mirëqenies Sociale, 70 për Ministrinë e Mbrojtjes, 70 për Ministrinë e Arsimit dhe 70 për Ministrinë e Punëve të Brendshme.
Ndërsa 20 kuota të tjera janë përcaktuar për Ministrinë e Drejtësisë, konkretisht për Policinë e Burgjeve.
Përfitimi nga kreditë e buta do të bëhet mbi bazën e një sistemi pikëzimi, ku do të merren në konsideratë kushtet e strehimit, gjendja ekonomike, familjare, sociale, si dhe statusi i punësimit të aplikantëve.
Kriteri kryesor lidhet me kushtet e strehimit. Punonjësit që aplikojnë nuk duhet të kenë banesë në pronësi, ose duhet të jetojnë në një banesë të mbipopulluar.
Të drejtë aplikimi kanë edhe punonjësit që kanë humbur banesën si pasojë e zbatimit të një vendimi gjyqësor, ata që banojnë në një banesë që do të prishet, si dhe rastet kur banesa përjashtohet nga procesi i legalizimit për shkak të investimeve publike dhe familja nuk përfiton një banesë tjetër.
Për Ministrinë e Shëndetësisë dhe Mirëqenies Sociale, mund të aplikojnë punonjësit që kanë të paktën 2 vite punë në administratën publike në momentin e aplikimit, si dhe ata që kanë jo më pak se 7 vite eksperiencë në administratë.
Kritere të ngjashme vlejnë edhe për kategoritë e tjera të administratës, ndërsa për Ministrinë e Punëve të Brendshme dhe Ministrinë e Drejtësisë shtohet edhe kriteri i të qenit familje e re.
Kreditë e lehtësuara do të jepen gjithashtu në varësi të kategorisë së pagës, duke synuar mbështetjen e punonjësve të administratës që kanë më shumë nevojë për zgjidhje strehimi.
Programi i kredive me interes zero synon të lehtësojë aksesin në banesë për punonjësit e shtetit, në një kohë kur çmimet e apartamenteve dhe kostot e strehimit janë rritur ndjeshëm në vend.
