Luftërat, terrori, përçarjet – këto janë çështjet që i shqetësojnë fëmijët dhe të rinjtë në Gjermani. Një studim zbulon, se cilat kriza i shqetësojnë ata më shumë.
Sipas një studimi të fundit (04.12.), shëndeti mendor i fëmijëve dhe adoleshentëve është më i keq se para pandemisë së koronavirusit. Ndërsa vajzat dhe djemtë tani nuk shqetësohen shumë për pasojat e pandemisë, siç njoftoi të enjten Qendra Mjekësore Universitare Hamburg-Eppendorf, çështjet globale dhe debatet shoqërore, siç janë luftërat dhe përçarjet shoqërore, luajnë një rol më të madh.
Në studimin përfaqësues, 22 përqind e fëmijëve dhe të rinjve raportuan për një cilësi të reduktuar të jetës, rreth shtatë pikë përqindje më e lartë se para pandemisë. 18 përqind thanë se ndiheshin të vetmuar. Para pandemisë, kjo shifër ishte vetëm 14 përqind. 70 përqind ishin të shqetësuar për luftërat, 62 përqind për terrorizmin dhe 57 përqind për krizat ekonomike. 56 përqind ishin të shqetësuar për ndarjen shoqërore, 51 përqind për imigracionin dhe 49 përqind për krizën klimatike. Vetëm 8 përqind shprehën shqetësim për pasojat e pandemisë COVID-19.
Vajzat dhe djemtë që e përjetojnë me ankth të ardhmen kanë një rrezik më të lartë për probleme të shëndetit mendor, simptoma depresive dhe vetmi, paralajmëroi autorja kryesore e studimit, Anne Kamm, nga spitali universitar. “Kjo sigurisht që është edhe për shkak të faktit se mjaft fëmijë e të rinj përballen shpesh me përmbajtje të pafiltruar ose shqetësuese përmes mediave sociale, gjë që i përkeqëson më tej këto zhvillime.” Ajo rekomandoi përmirësimin e njohurive mediatike.
Sipas studiuesve me qendër në Hamburg për studimin janë pyetur fëmijë dhe të rinj të moshës 7 deri në 23 vjeç nga 1,607 familje. Fëmijët e moshës 11 deri në 23 vjeç i plotësuan vetë pyetësorët e tyre online. Prindërit u përgjigjën për fëmijët e moshës 7 deri në 10 vjeç. Ky ishte raundi i tetë i “Studimit Copsy”, i cili shqyrton ndikimin e pandemisë së koronavirusit dhe krizave globale në shëndetin mendor të fëmijëve dhe të rinjve ne Gjermani. /DW
