Gjatë vitit 2025 në Shqipëri janë regjistruar 275 aksidente në punë, me pasoja të rënda për qindra punonjës dhe familjet e tyre.
Sipas të dhënave zyrtare të Inspektoratit të Punës, 48 punonjës kanë humbur jetën si pasojë e aksidenteve në vendin e punës, ndërsa 212 të tjerë kanë mbetur të plagosur ose të dëmtuar.
Shifrat tregojnë se siguria në punë mbetet ende një problem serioz, veçanërisht në sektorët me rrezikshmëri të lartë, si ndërtimi, minierat, energjia, infrastruktura dhe prodhimi.
Gjatë të njëjtit vit, Inspektorati i Punës ka kontrolluar 9,532 subjekte në të gjithë vendin, duke verifikuar kushtet e punësimit në mbi 205 mijë vende pune.
Pas konstatimit të shkeljeve, ndaj subjekteve janë vendosur 268 gjoba, me një vlerë totale prej 64.5 milionë lekësh.
Kontrollet kanë evidentuar gjithashtu 2,591 punonjës të padeklaruar. Sipas raportit, rreth 98% e tyre janë formalizuar pas ndërhyrjes së Inspektoratit të Punës.
Megjithëse formalizimi i punonjësve paraqitet si një rezultat pozitiv, numri i lartë i aksidenteve dhe viktimave tregon se masat për sigurinë dhe shëndetin në punë vazhdojnë të jenë të pamjaftueshme.
