Durana Tech Park, entitet 100 përqind publik me aksioner Korporatën e Investimeve Shqiptare, vijon të jetë në qendër të vëmendjes për mënyrën e funksionimit dhe për regjistrimin e kompanive në një projekt që, deri tani, nuk ka një godinë fizike dhe operon vetëm në formë virtuale.
Në këtë kontekst, drejtoresha Florenca Haxhi ka publikuar në rrjete sociale një video sqaruese, ku pretendon se parkut i është përcaktuar që në fillim një mënyrë operimi hibride, ndërsa aktualisht ai funksionon 100 përqind virtualisht.
Sipas saj, Durana operon në bazë të ligjit nr. 58 të vitit 2022 dhe një sërë vendimesh të qeverisë gjatë viteve 2024 dhe 2025. Haxhi veçon si më të rëndësishme VKM nr. 185, që sipas saj përcakton listën e aktiviteteve të lejuara në park, si dhe VKM nr. 73, që sipas saj përcakton mënyrën e operimit.
Në video, Haxhi shprehet se modeli është i tillë që në fazën e parë parku operon virtualisht dhe më pas, pas ndërtimit të parkut fizik, funksionon në mënyrë hibride.
Ajo thotë se kjo formë është mbështetur në modele të ngjashme që ekzistojnë në botë dhe synon të sigurojë përputhje mes investimit publik dhe nevojave të rezidentëve për hapësira fizike.
Sipas verifikimit të kryer nga Zëri.ai mbi VKM nr. 73 dhe VKM nr. 185, në dokumentacionin e vendimeve theksohet vendndodhja dhe sipërfaqja e parkut si objekt fizik, në Xhafzotaj të Durrësit.
Në vendim parashikohet miratimi i hapjes së parkut teknologjik dhe shkencor “Durana Tech Park” me sipërfaqe 140 400 metra katrorë dhe me vendndodhje në Xhafzotaj, Bashkia Durrës, në pasurinë nr. 336, zonë kadastrale 3852, sipas kufijve të përcaktuar në fragmenthartën kadastale.
Në të njëjtin dokument përmendet edhe kalimi i pronave shtetërore në pronësi të shoqërisë aksionare Korporata e Investimeve Shqiptare, si dhe përdorimi i pasurive të paluajtshme shtetërore nga Korporata e Investimeve Shqiptare, në rolin e zhvilluesit të parkut apo entiteti i krijuar prej saj, në funksion të parkut “Durana Tech Park”.
Ndërkohë, në këtë park që aktualisht operon virtualisht, janë regjistruar rreth 50 kompani. Mes tyre përmenden edhe kompani të lidhura me emra të përfshirë në dosjen e AKSHI-t, përfshirë Ermal Beqirin dhe Ergys Agasin.
Sipas të dhënave të listuara më herët edhe nga Skyweb.al, Beqiri figuron i lidhur me kompani si Data Storm, Nsolution dhe Al Soft, ndërsa në një rast tjetër kompania Test & Tech figuron me pronar Ergys Agasin dhe me administratore Ina Cikon, e cila është njëkohësisht administratore edhe e kompanisë EA Solution në pronësi të Agasit.
Në kushtet kur operimi vijon virtualisht, mbetet për t’u parë nëse dhe kur projekti do të kalojë në fazën e funksionimit me një ambient fizik, siç parashikohet nga koncepti i parkut në dokumentet ku përcaktohet vendndodhja dhe sipërfaqja në Xhafzotaj.
