Shqiptarët po orientohen gjithnjë dhe më shumë drejt makinave elektrike. Nga janari deri në maj 2025, Shqipëria regjistroi për herë të parë 1,665 automjete plotësisht elektrike, një rritje prej 56% krahasuar me të njëjtën periudhë të vitit 2024.
Aktualisht, 23.5% e mjeteve të reja të regjistruara janë plotësisht elektrike, duke sjellë një reduktim të konsiderueshëm të CO2 në mjedis rreth 10,616,760 kg CO2 në vit, dhe mbi 353,892 pemë mjedisore më të shëndetshme, shkruan Skyweb.al.
Flota aktive e mjeteve elektrike në Shqipëri ka arritur 8,043 automjete deri në maj 2025, një rritje prej 26% krahasuar me vitin 2024. Kjo tregon se tregu shqiptar po nis të përshtatet me trendin evropian të elektrifikimit. Objektivat e Bashkimit Europian janë zero shkarkim të CO2 deri në vitin 2050, ndërsa kjo nga prodhuesit e automjeteve nuk është pritur mirë. Industria ka argumentuar se ambiciet klimatike mund të kërcënojnë konkurencën brenda sektorit.
Megjithatë, të dhënat për Shqipërinë tregojnë se vendi po shkon drejt një infrastrukture më të gjelbër për transportin dhe një ulje të ndjeshme të ndotjes nga automjetet tradicionale. Ekspertët e Mjedisit këtë e lidhin edhe me kostot e ulëta të mjeteve elektrike, ku karburanti në Shqipëri mbetet i kushtueshëm.
Por, ndonëse trendi duket pozitiv, sfidat mbeten të mëdha, duke përfshirë nevojën për karikues, energji të përballueshme dhe politika fiskale stimulative për blerësit. /Skyweb.al
