Administrata Amerikane e Aviacionit ka publikuar një alarm sigurie për të gjitha linjat ajrore, në lidhje me pajisjet personale të pasagjerëve që po shkaktojnë zjarr, duke vënë në rrezik jetën gjatë fluturimeve.
FAA përmes paralajmërimit zyrtar u kërkon linjave ajrore të marrin masa të menjëhershme për të adresuar rrezikun në rritje që vjen nga bateritë litium që mbajnë pasagjerët në kabinën e avionëve.
Ky njoftim vjen pas një valë incidentesh të lidhura me pajisjet elektronike personale, përfshirë shpërthime, tym dhe zjarr gjatë fluturimeve komerciale.
Shumë nga pajisjet që kanë shkaktuar incidente vijnë nga prodhues me reputacion të dobët, ose përmbajnë bateri, që nuk i përmbushin standardet ndërkombëtare të sigurisë. Për këtë arsye, Administrata Amerikane e Aviacionit i bën thirrje edhe industrisë teknologjike dhe pasagjerëve të jenë më të kujdesshëm me produktet që mbajnë gjatë udhëtimeve.
FAA tha se këtë vit në SHBA janë raportuar 50 incidente me tym, zjarr ose nxehtësi ekstreme të baterive me litium, dhe disa prej tyre kanë rezultuar në lëndime.
Incidenti më i fundit u shënua në 5 gusht , ku celulari i një pasagjeri në një fluturim të American Airlines u nxeh dhe filloi të lëshonte tym. Pasagjeri pësoi lëndime, dhe pati dëme në dyshemenë e avionit dhe fluturimi u vonua.
Rritja e numrit të pajisjeve personale elektronike në fluturime, bashkë me mungesën e vetëdijes për rreziqet që ato mbartin, po krijojnë një sfidë të re për sigurinë ajrore.
FAA thekson se pa ndërhyrje dhe vetëdijesim të menjëhershëm, ky rrezik mund të bëhet pjesë e përditshme e fluturimeve moderne. /Skyweb.al
