Qeveria po përgatit një reformë të re për strehimin, e cila do të përfshijë gjashtë programe për familjet që nuk kanë mundësi të sigurojnë vetë një banesë.
Detajet u prezantuan nga kryeministri Edi Rama gjatë aktivitetit për Programin Kombëtar të Strehimit “Rilindja 2.0”. Drafti ligjor do të hidhet fillimisht për konsultim publik dhe më pas do t’i dërgohet Kuvendit për miratim.
“Janë gjashtë programe të reja, që do t’i adresojmë të gjitha së bashku. Nuk kam parasysh shpikje kur them të reja, por janë të ambalazhuara së bashku në një reformë tërësore”, deklaroi Rama.
Programi i parë lidhet me banesat sociale me qira. Sipas kryeministrit, qytetarët nuk do të duhet të presin vetëm ndërtimin e apartamenteve të reja dhe renditjen në listat e gjata të bashkive.
Për sigurimin e banesave sociale do të përdoren disa mënyra: ndërtimi i objekteve të reja, blerja e apartamenteve drejtpërdrejt nga tregu, përshtatja e pronave shtetërore dhe përdorimi i ndërtimeve të konfiskuara.
Pjesë e programit do të vazhdojë të jetë edhe bonusi i qirasë për familjet që nuk përballojnë dot pagesën mujore të një banese.
“Kemi konfiskuar jo pak objekte dhe do të konfiskojmë çdo objekt që shkel rregullat për lejet e ndërtimit. Do të përdorim të gjitha instrumentet”, tha Rama.
Programi i dytë parashikon banesa me kosto të ulët, duke subvencionuar interesat e kredive për familjet përfituese. Banesa e financuar me kredi do të përfshihet në kategorinë e banesave me kosto të ulët.
Programi i tretë do të financojë përmirësimin e banesave ekzistuese të familjeve vulnerabël, ndërsa i katërti do të përfshijë investime në infrastrukturën e zonave informale dhe përshtatjen e objekteve të caktuara për strehim social.
Programi i pestë lidhet me sigurimin e banesave të përkohshme për qytetarët që humbasin shtëpitë ose detyrohen të largohen për shkak të tërmeteve, përmbytjeve, zjarreve dhe fatkeqësive të tjera natyrore.
Programi i gjashtë parashikon banesa të përshtatura posaçërisht për familjet që kanë persona me aftësi të kufizuara dhe për individët me nevoja të veçanta.
Gjashtë programet nuk kanë hyrë ende në fuqi. Mënyra e përfitimit, kriteret për familjet dhe detyrimet e bashkive do të përcaktohen në draftin që do të kalojë në konsultim publik dhe më pas për votim në Kuvend. /skyweb.al
