Përplasja mes kryeministrit Edi Rama dhe kryebashkiakut të Tiranës, Erion Veliaj, duket se ka hyrë në një fazë të re, duke e kthyer konfliktin e deritanishëm në distancë në një përballje të hapur politike.
Tensionet janë përshkallëzuar pas transferimit të Veliajt në burgun e Fierit, ndërsa raportimet e fundit flasin për një ultimatum të drejtpërdrejtë të Ramës, të përcjellë përmes ministrit të Drejtësisë, Toni Gogu.
Sipas Hashtag.al, mbrëmjen e 30 tetorit, Gogu ka shkuar në burgun e Fierit, i veshur sportiv dhe me një kapele në kokë, për t’i përcjellë Veliajt një mesazh nga kryeministri.
Vizita nuk është regjistruar në dokumentacionin e hyrje-daljeve të institucionit dhe se ministri është takuar vetëm për vetëm me kryebashkiakun.
Gogu i është drejtuar Veliajt me këto fjalë:
“Jam me porosi të KM këtu. Dua të të përcjellë tekstualisht atë që KM më ka porositur:
‘Është hera e fundit që po të drejtohem si babai yt politik, nga sot e tutje do të drejtohem veç si kryeministër.
-Dorëzo mandatin urgjentisht.
-Delego pushtetin te emrat që do të them unë.
-Hiq dorë nga avokati Plarent Ndreca.
Në të kundërt, do të transferoj te burgu 302 dhe do orientoj SPAK-un të nis hetime për minim të rendit kushtetues dhe do të të kalb në burg.”
Veliaj është përgjigjur menjëherë dhe i ka thënë ministrit të Drejtësisë se “dhe sikur 100 vite burg të bëj, nuk ja marr fytyrën fëmijëve të mi”.
Ajo që fillimisht mund të mbetej një raportim i mirë gazetaresk i Hashtag.al, mbi çfarë ndodhi natën e 30 tetorit, tashmë ka marrë një tjetër peshë pas konfirmimit të mesazhit nga avokati i Veliajt, Plarent Ndreca, sipas raportimit të Panoramës.
Konfirmimi nga përfaqësuesi ligjor i kryebashkiakut tregon se përplasja mes Ramës dhe Veliajt ka dalë tashmë hapur, duke marrë përmasat e një lufte politike mes dy figurave të rëndësishme të Partisë Socialiste.
Nga njëra anë është ultimatumi për dorëzimin e mandatit, delegimin e kompetencave dhe largimin e avokatit, ndërsa nga ana tjetër qëndron refuzimi i Veliajt për t’iu nënshtruar kërkesave të përcjella përmes ministrit të Drejtësisë.
Fakti që mesazhi është bërë publik dhe është konfirmuar nga pala e Veliajt shënon një përshkallëzim të drejtpërdrejtë të konfliktit, duke nxjerrë në sipërfaqe përplasjen për kontrollin e Bashkisë së Tiranës. /skyweb.al
