Ekziston një mjet falas i automatizuar që heq informacionin tënd nga rezultatet e kërkimit në Google, por shumë njerëz nuk e përdorin sepse nuk e dinë që ekziston. Shumë kompani të quajtura “data brokers” shesin online emrin, adresën e shtëpisë, numrin e telefonit dhe të dhëna të tjera personale me çmime shumë të ulëta. Këto informacione mund të përfundojnë në duart e telemarketingut, mashtruesve apo hajdutëve të identitetit, duke rrezikuar sigurinë tënde, shkruan BBC.
Google ofron një shërbim falas të quajtur Results About You, i cili të lejon të kërkosh heqjen e informacionit personal nga rezultatet e kërkimit. Google skanon vazhdimisht internetin për motorin e tij të kërkimit dhe gjatë këtij procesi mund të shfaqë edhe të dhëna sensitive që janë publikuar nga palë të treta. Me këtë mjet, pasi regjistrohesh dhe vendos të dhënat që dëshiron të monitorosh, Google të njofton nëse gjen emrin, emailin, adresën apo numrin tënd të telefonit dhe të jep mundësinë të kërkosh heqjen e tyre nga kërkimi. Në SHBA mund të raportohen edhe numra të sigurimeve shoqërore, pasaporta apo patentë drejtimi.
Megjithatë, ka disa kufizime. Ky shërbim nuk e fshin informacionin nga faqet e internetit ku është publikuar, por vetëm e heq nga rezultatet e kërkimit në Google. Gjithashtu, nuk të mbron nga të dhënat e shpërndara në tregjet kriminale pas sulmeve kibernetike. Për ta përdorur shërbimin, duhet të japësh vetë informacionin që dëshiron të monitorosh, gjë që mund të ngrejë shqetësime për privatësinë, edhe pse Google deklaron se këto të dhëna nuk përdoren për qëllime të tjera dhe mbrohen me masa sigurie.
Sipas ekspertëve të privatësisë nga Electronic Frontier Foundation, ky është një nga mjetet më të thjeshta dhe më të dobishme për të ulur ekspozimin online. Që nga lansimi në vitin 2022, mbi 10 milionë persona e kanë përdorur, megjithëse kjo mbetet një pjesë e vogël krahasuar me numrin total të përdoruesve të Google. Nëse dëshiron ta fshish plotësisht informacionin nga interneti, duhet të kontaktosh drejtpërdrejt kompanitë që e publikojnë ose të përdorësh shërbime të specializuara për fshirjen e të dhënave. /skyweb.al
