Pas publikimit të një artikulli investigativ që zbardhi një skemë të dyshuar mashtrimi me rimbursimet e barnave Foster dhe Trimbow, sipërmarrësi Nadir Çausholli ka reaguar publikisht përmes një postimi të gjatë në rrjetin social Facebook, duke mohuar kategorikisht çdo përfshirje të kompanisë së tij.
Në deklaratën e tij, Çausholli akuzon drejtpërdrejt biznesmenin Ilir Shehu (i njohur edhe si Ilir Pasholli), pronar i kompanive “Medicamenta” dhe “Mega Store”, si nxitësin kryesor të këtij sulmi mediatik.
Ai pretendon se motivi qëndron tek fakti se kompania italiane Chiesi Farmaceutici, prodhuese e barnave në fjalë, po shqyrton t’i transferojë ekskluzivitetin e distribucionit nga kompania e Shehut tek ajo e Çaushollit.
“E gjitha kjo është një hakmarrje tregtare, sepse kompania italiane do të na japë ekskluzivitetin neve. Ky është sponsorizuesi i sulmeve online ndaj meje,” – shkruan Çausholli.
Ai shkon më tej, duke sjellë akuza të forta për të kaluarën e Ilir Shehut, të cilin e lidh me trafik ndërkombëtar droge dhe mashtrime në tregun farmaceutik. “Sipas farmacive, ai ka ndryshuar mbiemrin për të fshehur të shkuarën. Ka ndërtuar dy godina në Shqipëri me të ardhura që nuk justifikohen. A nuk duhet hetuar nga SPAK dhe të nisë një hetim pasuror?”, pyet Çausholli në postim.
Artikulli investigativ i publikuar një ditë më parë pretendonte se sasia e barnave Foster dhe Trimbow e disponueshme në treg është disa herë më e madhe sesa ajo që importon vetë kompania Chiesi, duke ngjallur dyshime për mashtrime me rimbursimet, falsifikime dhe kontrabandë të organizuar, ku përfshihen kompani private, rrjete farmacish dhe institucione shtetërore si Fondi i Sigurimeve dhe Ministria e Shëndetësisë.
Në këtë klimë akuzash të ndërsjella, pritet që institucionet përkatëse të reagojnë me hetime të thelluara për të zbardhur të vërtetën dhe për të verifikuar nëse kemi të bëjmë me një skandal të rëndë në sistemin e barnave të rimbursueshme apo me një luftë të egër tregtare në industrinë farmaceutike shqiptare.
