Sipërmarrësi dhe eksperti i turizmit, Zak Topuzi, ka reaguar në rrjetet sociale lidhur me shqetësimet e ngritura nga pushuesit për dukurinë e “llumit” apo “flluskave të bardha” që janë shfaqur së fundmi mbi sipërfaqen e detit në brigjet e Adriatikut dhe Jonit. Ai thekson se fenomeni është plotësisht natyror dhe nuk ka lidhje me ndotjen.
Topuzi sqaroi se bëhet fjalë për një dukuri të njohur në Mesdhe, të quajtur “mucillagini”, një substancë ngjitëse e prodhuar nga mikroalga Gonyaulax Fragilis, e cila shpërndahet në sipërfaqen e ujit kur temperaturat rriten dhe deti është i qetë. Këto kushte janë të zakonshme gjatë verës dhe ndikohen nga efektet e ngrohjes globale.
“Ky proces nuk është i dëmshëm për shëndetin e njeriut dhe nuk përbën ndotje ujore,” – shpjegon ai, duke iu referuar studimeve të biologëve detarë të Universitetit të Milanos.
Sipas ekspertëve, formacionet e “mucillaginës” veprojnë si sfungjerë natyrorë që përthithin mikrogrimca, por pa pasur ndikim negativ për njerëzit që lahen në det.
Topuzi kritikon mungesën e informacionit zyrtar dhe kërkon ndërhyrjen e menjëhershme të Ministrisë së Turizmit për të sqaruar publikun dhe për të shmangur dezinformimin që po dëmton imazhin e turizmit bregdetar shqiptar.
“Keqinterpretimet dhe paniku i nxitur nga lajme të pakonfirmuara për ndotje, po përhapin pasiguri dhe dëmtojnë industrinë e turizmit në kulmin e sezonit. Turistët kanë të drejtë të informohen drejt dhe të pushojnë të qetë,” – shkruan ai.
Ai i bën thirrje autoriteteve që të komunikojnë me transparencë dhe të bazohen në të dhëna shkencore për të ruajtur besimin e publikut dhe të vizitorëve.
Lexoni më shumë: https://www.centropagina.it/ancona/attualita-mucillagini-mar-adriatico-biologa-marina/?fbclid=IwQ0xDSwLh9RlleHRuA2FlbQIxMQABHk5UeVBmWAh7SMEy5d_Hb9ZK-so6Gzp9C5eVURoZ8AJSrauvwWtNVfvLKqKu_aem_6PE-ZCb93sTSab60EucGNQ
