Tregu i pasurive të paluajtshme në Shqipëri vijon të tregojë zhvillime pozitive, duke reflektuar ndikimin e tij të drejtpërdrejtë mbi ekonominë dhe sistemin financiar të vendit. Banka e Shqipërisë ka publikuar së fundmi analizën e re të tregut për gjashtëmujorin e dytë të vitit 2024.
Sipas të dhënave raportohen vlerësime më optimiste për situatën aktuale në treg, si dhe për pritshmëritë në vijim. Numri i subjekteve që kanë realizuar shitje është rritur lehtë, ndërkohë që rreth 50% e pronave të shitura janë blerë përmes kredisë bankare, me shumicën që mbulojnë deri në 60% të vlerës së pronës.
Ndërkohë, interesi i blerësve jorezidentë mbetet i lartë, veçanërisht nga vendet e Bashkimit Evropian. Ndërkaq, një tjetër tregues i rëndësishëm është reduktimi i kohës mesatare të shitjes, sidomos në qarkun e Tiranës, duke sinjalizuar një treg më dinamik dhe likuid.
Ndërkohë pritet një rritje e numrit të pronave në shitje, sidomos në Tiranë dhe në zonat bregdetare.
Ky publikim është rezultat i një pune disavjeçare të Bankës së Shqipërisë në bashkëpunim me INSTAT. Të dhënat përfshijnë informacione cilësore dhe sasiore nga 230 kompani ndërtimi dhe agjenci imobiliare, dhe shërbejnë si bazë për hartimin e Indeksit të Çmimit të Banesave.
Banka thekson se kjo analizë, edhe pse e rëndësishme, nuk lejon ende nxjerrjen e konkluzioneve për normalitetin apo devijimin e çmimeve, për shkak të kufizimeve metodologjike dhe të dhënave ende të paplota. Megjithatë, është një hap domethënës drejt krijimit të një sistemi të përhershëm statistikash për tregun e pasurive të paluajtshme, sipas standardeve të Bashkimit Evropian./tvscan
