Qeveria ka miratuar një vendim, i cili ngarkon Koroporatën e Investimeve Shqiptare për transformimin e zonës së ish-kombinatit Metalurgjik në qytetin e Elbasanit. Vendimi i hap rrugë nxjerrjes së zonës së madhe të Metalurgjikut në tender përmes bashkëpunimit me privatët për realizimin e projekteve strategjike të investimit.
Korporata e Investimeve Shqiptare, do të ndërmarrë të gjithë masat për konsolidimin e pronës shtetërore, duke përfshirë bashkëpunimin me Agjencinë Shtetërore të Kadastrës, shoqëritë shtetërore dhe subjektet private për sqarimin e statusit juridik të pronave.
Paralelisht, do të hartohet një plan i detajuar qendror zhvillimi dhe një projekt konkret për zhvillimin e zonës, në bashkëpunim me institucionet përgjegjëse për planifikimin dhe zhvillimin e territorit.
Afatet për përgjigjet nga institucionet përkatëse janë përcaktuar me 5 ditë nga marrja e kërkesës zyrtare nga KISH, ndërkohë që Ministria e Ekonomisë do të monitorojë dhe vlerësojë ecurinë e përmbushjes së detyrave.
Kjo nismë vjen në një moment kur qeveria shqiptare është e fokusuar në aktivizimin e pronave publike për të nxitur zhvillimin ekonomik, krijimin e vendeve të reja të punës dhe tërheqjen e investimeve të huaja dhe vendase në sektorë prioritarë.
Zona e ish-Kombinatit Metalurgjik përfaqëson një hapësirë strategjike, me potencial të konsiderueshëm për zhvillim industrial, logjistik dhe teknologjik.
Ndërkohë gjatë fushatës elektorale, kryeministri Edi Rama premtoi se metalurgjiku do të bëhet së bashku me motoparkun, pika që do të bashkojë Tiranën dhe Elbasanin dhe do ta bëjë Elbasanin pjesë të metropolit të Shqipërisë në dekadat e ardhme.
“Qëllimi është të hyjmë në një fazë të re në transformimin e territorit të kombinatit metalurgjik në një park kombëtar industrial, i cili ka një potencial të jashtëzakonshëm dhe për të cilin ne duam të mbështetemi në një aleancë me bizneset që janë këtu. Jo vetëm për zgjerimin tuaj, por edhe për të ndërtuar një koncept të ri në administratën e jetës së përditshme të këtij territori. Ne kemi angazhuar një numër të konsiderueshëm arkitektësh të huaj dhe vendas, ndër më të mirët, për të zbatuar masterplanin,” tha Rama. /kapitali
