Qeveria shqiptare ka miratuar një vendim që detyron të gjithë qytetarët me vendbanim apo vendqëndrim në territorin e Republikës së Shqipërisë të deklarojnë adresën e banimit përmes portalit shtetëror e-Albania.
Deklarimi nuk do të jetë më një opsion, por një detyrim dhe duhet të shoqërohet me dokumentacion që provon adresën e deklaruar, si akti i pronësisë së banesës, kontrata e qirasë apo çdo dokument tjetër të ligjshëm që vërteton vendbanimin.
Sipas dokumentit të publikuar në Fletoren Zyrtare, procesi i vetëdeklarimit do të bëhet në mënyrë elektronike, dhe do të vlejë edhe për rastet kur qytetari ndryshon vendbanimin apo vendqëndrimin. Në çdo rast, dokumentet e ngarkuara në sistem ruhen në Regjistrin Kombëtar të Gjendjes Civile.
Nëse një qytetar kërkon të regjistrohet në një familje ekzistuese, atëherë kryefamiljari duhet ta konfirmojë online këtë kërkesë. Ndërkohë, çdo anëtar madhor që kërkon të ndryshojë adresë, duhet fillimisht të shkëputet nga familja ekzistuese në sistemin elektronik.
Zyrat e gjendjes civile kanë detyrimin të verifikojnë vërtetësinë e të dhënave dhe adresave të deklaruara. Në rast të mungesës së dokumentacionit, qytetarët njoftohen brenda 24 orëve përmes e-Albania-s dhe duhet të plotësojnë dokumentet brenda 3 ditëve nga njoftimi.
Nëse adresa nuk përmban të gjithë elementët e nevojshëm, nëpunësit e gjendjes civile kanë të drejtë ta saktësojnë atë edhe pa aplikim nga qytetari.
Vendimi përcakton se të gjithë anëtarët e një familjeje duhet të kenë të njëjtën adresë vendbanimi dhe që kjo adresë të jetë e plotë sipas standardeve ligjore. Çdo ndryshim i adresës së një anëtari të familjes pasqyrohet për të gjithë anëtarët, nëse kryhet nga kryefamiljari.
Vendimi parashikon që institucionet shëndetësore dhe ato të ekzekutimit të vendimeve penale, kur mbajnë shtetas për më shumë se tre muaj, të raportojnë automatikisht vendqëndrimin e tyre pranë gjendjes civile. Pas lirimit, qytetarët kanë pesë ditë kohë për të përditësuar adresën në sistem.
Me hyrjen në fuqi të këtij vendimi të ri, shfuqizohet vendimi nr. 1243, datë 11.12.2009 i Këshillit të Ministrave që rregullonte më parë procedurat për ndryshimin e adresës. Zbatimi i rregullave të reja do të ndiqet nga Ministria e Brendshme, Drejtoria e Gjendjes Civile, si dhe njësitë e vetëqeverisjes vendore.
Ky vendim i ri është një hap drejt digjitalizimit të plotë të regjistrit të adresave në Shqipëri, por gjithashtu sjell një përgjegjësi të re për qytetarët për të provuar me dokumentacion të vlefshëm adresën e banimit apo të qëndrimit të tyre në vend. /skyweb.al
