Aksionet e BMW-së u rritën me më shumë se 3% në orët e para të pasdites në Evropë të mërkurën, ndërsa investitorët po shqyrtonin planet e fundit të prodhuesit gjerman të automjeteve për rimëkëmbje, të prezantuara për investitorët dhe analistët gjatë aktivitetit dyditor “Capital Market Day”, të zhvilluar të martën dhe të mërkurën.
Kjo vjen në një kohë kur prodhuesit gjermanë të automjeteve po përpiqen të rikthejnë rentabilitetin, mes kostove të kalimit drejt automjeteve elektrike, ndërprerjeve globale të furnizimit, çmimeve të larta të energjisë dhe konkurrencës së fortë nga rivalët kinezë.
BMW planifikon të përmirësojë rentabilitetin duke thjeshtuar gamën e modeleve, duke shkurtuar kohën e zhvillimit dhe duke bashkëpunuar më ngushtë me furnizuesit.
BMW prezantoi gjithashtu planet për të ulur me 20% numrin e divizioneve dhe pozicioneve përkatëse drejtuese deri në mesin e vitit 2027, si pjesë e ristrukturimit më të gjerë. Kompania planifikon gjithashtu të reduktojë numrin e varianteve të modeleve dhe të përdorë më shumë inteligjencën artificiale (AI), përfshirë simulimet e përplasjeve dhe sistemet e asistencës së shoferit.
Prodhuesi gjerman synon të rrisë marzhin operativ të divizionit të automjeteve në 3%–5% deri në vitin 2028 dhe të rikthehet në objektivin afatgjatë prej 8%–10% në fillim të dekadës së ardhshme, çka tregon se rimëkëmbja do të jetë një proces i gjatë.
Veçmas, BMW njoftoi se do të investojë rreth 2 miliardë euro në objektet e prodhimit në Gjermani, përfshirë 1 miliard euro për një fabrikë baterish.
“Ne po investojmë në krijimin e vlerës, prodhimin konkurrues dhe sigurinë e vendeve të punës në Gjermani”, tha në një deklaratë Raymond Wittmann, drejtuesi i prodhimit të BMW-së.
Me këtë investim, fabrika e Mynihut, e cila është më shumë se 100 vjeçare, do të transformohet për të prodhuar vetëm automjete elektrike nga viti 2027, përfshirë BMW i3. Në të njëjtën kohë, versionet me motor me djegie të brendshme dhe versionet hibride plug-in të BMW Serisë 3 do të prodhohen në Dingolfing.
BMW theksoi se rreth 760 lokacione të furnizuesve furnizojnë fabrikat e Mynihut dhe Dingolfing me komponentë dhe materiale. Më shumë se 70% e këtyre lokacioneve të prodhimit ndodhen në Evropë, ndërsa më shumë se 30% janë në Gjermani.
Fabrika e re e baterive të kompanisë në Irlbach-Straßkirchen, në Bavari, do të furnizojë me bateri të tensionit të lartë BMW i3 elektrik duke filluar nga tetori.
