Autoriteti i Konkurrencës ka njoftuar nisjen e monitorimit të tregut të karburanteve në Shqipëri, si në nivel shumice ashtu edhe në shitjen me pakicë. Sipas institucionit, të gjitha subjektet që operojnë në këtë treg janë aktualisht nën monitorim për mënyrën se si reflektohen ndryshimet e çmimeve në treg.
Autoriteti bën të ditur se çdo rritje apo luhatje e çmimeve të karburanteve do të verifikohet në raport me zhvillimet në bursat ndërkombëtare. Në rastet kur konstatohet se çmimet në tregun vendas nuk reflektojnë në mënyrë proporcionale ndryshimet në tregjet ndërkombëtare, do të kryhen verifikime të detajuara.
Nëse rezulton se rritjet janë të pajustifikuara, Autoriteti i Konkurrencës paralajmëron se do të ndërmerren masa sipas parashikimeve ligjore ndaj subjekteve që operojnë në treg.
Sipas institucionit, qëllimi i këtij procesi është garantimi i transparencës dhe funksionimit të rregullt të tregut të karburanteve, si edhe mbrojtja e konsumatorëve nga çmime të padrejta apo praktika që dëmtojnë konkurrencën.
Autoriteti thekson se në rast se vërehen luhatje çmimesh që tejkalojnë ndryshimet në bursat ndërkombëtare, në zbatim të ligjit nr. 9121 të vitit 2003 për mbrojtjen e konkurrencës do të ndërmerren masat e nevojshme sipas kompetencave që parashikon ligji. /skyweb.al
