Më shumë se gjysma e të rriturve në vendin tonë dhe rreth 10% e fëmijëve janë mbipeshë ose obezë. Alarmi ngrihet nga Instituti i Shëndetit Publik, i cili thekson se shkaktarët kryesorë janë mungesa e aktivitetit fizik dhe konsumimi i ushqimeve të përpunuara.
Sipas specialistes së ISHP-së, Jolanda Hyska, rreth 60% e popullsisë është mbipeshë ose obeze, ndërsa afro 20% klasifikohen në nivel obeziteti. Edhe te fëmijët situata mbetet shqetësuese dhe në nivele të krahasueshme me mesataren europiane, ku 1 në 10 fëmijë rezulton mbipeshë ose obez. Sipas projeksioneve për vitin 2035, nëse trendi vijon, numri i personave me obezitet pritet të rritet ndjeshëm.
Mjekët paralajmërojnë se kjo situatë do të përkthehet në më shumë raste me sëmundje kardiovaskulare, hipertension dhe diabet në popullatë. Në Ditën Botërore kundër Obezitetit, ata bëjnë thirrje për ndërgjegjësim dhe masa parandaluese.
Specialistët theksojnë se parandalimi duhet të nisë që në momentin e planifikimit të shtatzënisë, duke i kushtuar rëndësi ushqyerjes dhe aktivitetit fizik. Ushqyerja me gji konsiderohet një faktor mbrojtës ndaj obezitetit në moshë të hershme. Objektivi kryesor mbetet ndalimi i rritjes së mëtejshme të obezitetit, ndërsa ulja e tij shihet si një synim afatgjatë. Sipas të dhënave, në dhjetë vitet e fundit obeziteti tek fëmijët është dyfishuar.
Në nivel global, sipas Organizates Botërore te Shëndetësisë, rreth 3 miliardë njerëz jetojnë me mbipeshë ose obezitet, ndërsa afërsisht 1.7 milion persona humbasin jetën para kohe çdo vit nga sëmundje jo të transmetueshme, ku obeziteti është një faktor i rëndësishëm rreziku.
