Mbledhja e Këshillit Bashkiak të Bulqizës është ndërprerë këtë të enjte mes tensioneve të forta, pasi banorët e Gjoricës kanë kundërshtuar ndërtimin e paneleve fotovoltaike në zonën e tyre.
Banorët kanë hyrë në ambientet e bashkisë duke kërkuar ndalimin e projektit, të cilin e konsiderojnë kërcënim të drejtpërdrejtë për kullotat që përdorin prej vitesh për blegtori. Sipas tyre, humbja e këtyre hapësirave rrezikon jetesën e dhjetëra familjeve që mbështeten tek bagëtia.
Situata është përshkallëzuar edhe më tej për shkak të pranisë së forcave të policisë, të cilat kanë penguar hyrjen e banorëve në sallën e mbledhjes, duke çuar në ndërprerjen e saj.
Protestuesit kanë ngritur gjithashtu akuza për parregullsi në procesin e miratimit të projektit, duke pretenduar se firmat në mbështetje të tij janë mbledhur edhe nga persona që nuk jetojnë në Gjoricë, çka sipas tyre e bën të pavlefshëm procesin.
Plas në Gjoricë të Bulqizës, banorët kundër dhënies me qira të kullotave nga bashkia te privatët
Kjo përplasje nuk është e izoluar. Vetëm pak javë më parë, një dëgjesë publike në Gjoricë të Poshtme u shoqërua me tensione të forta, pasi banorët kundërshtuan dhënien me ankand të tokave pyjore dhe kullosore për projekte ekonomike, kryesisht energjetike.
Në atë takim, komuniteti ngriti shqetësimin se mbi 100 hektarë tokë janë dhënë tashmë për projekte të tilla, ndërsa sipërfaqe të tjera janë në plan, duke reduktuar ndjeshëm hapësirat për blegtori.
Banorët paralajmërojnë se nëse kjo prirje vijon, zona rrezikon të humbasë funksionin e saj tradicional ekonomik dhe të përballet me braktisje, ndërsa theksojnë se nuk janë kundër investimeve, por kundër mënyrës se si po realizohen ato.
Nga ana tjetër, Bashkia argumenton se toka është pronë e saj dhe mund të përdoret për projekte zhvillimi, ndërsa një pjesë e banorëve mbështesin investimet si mundësi për të gjeneruar të ardhura.
Përplasja në Bulqizë nxjerr në pah konfliktin në rritje mes projekteve energjetike dhe mbijetesës së ekonomisë rurale, ku blegtoria mbetet ende burimi kryesor i të ardhurave për komunitetin lokal. /skyweb.al
