Kompania braziliane Embraer po zgjeron praninë e saj në Greqi përmes një marrëveshjeje strategjike në sektorin e aviacionit dhe mbrojtjes.
Embraer ka nënshkruar një Memorandum Mirëkuptimi me Industrinë Greke të Hapësirës Ajrore, me qëllim forcimin e bashkëpunimit për avionët ushtarakë C 390 Millennium. Marrëveshja synon që Forcat Ajrore Greke të fitojnë më shumë autonomi në menaxhimin, mirëmbajtjen dhe mbështetjen teknike të flotës së ardhshme të këtyre avionëve.
Për Greqinë, marrëveshja shihet si një hap drejt forcimit të industrisë vendase të mbrojtjes dhe krijimit të kapaciteteve afatgjata për mirëmbajtjen e avionëve modernë ushtarakë. Ndërsa për Embraer, ajo është pjesë e strategjisë për të zgjeruar praninë në tregun europian.
C 390 Millennium është një avion transporti ushtarak i gjeneratës së re, i projektuar për misione të ndryshme, nga transporti i trupave dhe ngarkesave deri te operacionet humanitare, evakuimet dhe furnizimi ajror. Ai vlerësohet për fleksibilitetin, besueshmërinë dhe efikasitetin operacional.
Embraer është një nga kompanitë që vitet e fundit po konsolidohet fort në prodhimin e avionëve, si në segmentin civil, ashtu edhe në atë ushtarak. Kompania e nisi historinë e saj kryesisht me avionë civilë rajonalë dhe sot është e njohur globalisht për familjen E Jet, ku përfshihen modele si Embraer E175, E190 dhe E195.
Këta avionë përdoren gjerësisht nga kompani ajrore europiane për fluturime rajonale dhe me distancë të mesme. Modele të familjes Embraer E Jet fluturojnë edhe drejt Shqipërisë, përmes kompanive si Austrian Airlines dhe Lufthansa Group, të cilat i përdorin në rrjetin e tyre europian.
Marrëveshja në Greqi tregon se Embraer nuk po shihet më vetëm si prodhues avionësh civilë rajonalë, por edhe si një aktor gjithnjë e më i rëndësishëm në tregun e mbrojtjes.
Për Athinën, bashkëpunimi lidhet me modernizimin e kapaciteteve ajrore, ndërsa për Embraer është një tjetër hap drejt forcimit të pozicionit në Europë. /skyweb.al
