Aeroporti Ndërkombëtar i Tiranës është renditur i pari ndër aeroportet e mëdha të Europës për rritjen e trafikut të pasagjerëve gjatë tremujorit të tretë të vitit 2026.
Sipas të dhënave të publikuara nga Tirana International Airport, duke iu referuar raportit të Këshillit Ndërkombëtar të Aeroporteve për Europën (ACI Europe), numri i pasagjerëve në aeroportin e Rinasit është rritur me 23.3% krahasuar me të njëjtën periudhë të vitit të kaluar.
Ky rezultat e vendos Tiranën në krye të kategorisë Large Airports, ku ACI Europe përfshin aeroportet që përpunojnë nga 10 deri në 25 milionë pasagjerë në vit.

Pas Tiranës renditet aeroporti i Tel Avivit, në Izrael, me një rritje prej 22.6%, ndërsa në vendin e tretë është aeroporti i Tashkentit, në Uzbekistan, me 15.8%.
Pesëshja plotësohet nga aeroporti i Krakovit, në Poloni, me një rritje prej 14%, dhe ai i Venecias, në Itali, me 13.2%.
Të dhënat tregojnë se Rinasi ka regjistruar një ritëm më të lartë zgjerimi të trafikut krahasuar me aeroportet e tjera të kësaj kategorie, përfshirë disa prej qendrave të rëndësishme të transportit ajror dhe turizmit.
Rritja prej 23.3% është gjithashtu dukshëm më e lartë se mesatarja e tregut europian.
Sipas raportit të ACI Europe, trafiku i pasagjerëve në rrjetin e aeroporteve europiane u rrit me 3.4% gjatë tremujorit të tretë të vitit 2026, krahasuar me të njëjtën periudhë të vitit 2025.
Edhe të dhënat e veçanta për muajin shtator konfirmojnë ecurinë pozitive të aeroportit të Tiranës.
Raporti zyrtar i ACI Europe, i publikuar më 17 nëntor, e rendit Rinasin të parin në kategorinë e aeroporteve të mëdha edhe për muajin shtator, me një rritje prej 21.3% të numrit të pasagjerëve.
Në këtë renditje mujore, Tirana pasohet nga Krakova me 15.5%, Venecia me 14.6%, Tel Avivi me 14% dhe Tashkenti me 13.7%.
Rezultatet pasqyrojnë zgjerimin e vazhdueshëm të trafikut ajror në Shqipëri, në një periudhë kur tregu europian po shënon ritme më të moderuara rritjeje. /skyweb.al















