Kanë nisur punimet për ndërtimin e bypass-it të Elbasanit, një projekt që synon të lehtësojë trafikun dhe të përmirësojë lidhjet rrugore mes Tiranës, jugut dhe juglindjes së vendit.
Ministri i Infrastrukturës dhe Energjisë, Enea Karakaçi, bëri të ditur se bypass-i do të ndërtohet sipas standardeve të autostradës Tiranë–Elbasan, duke e klasifikuar aksin si autostradë të kategorisë A.
“Kemi filluar punimet në bypass-in e Elbasanit. Pjesa ku kemi nisur punën është aty ku fillon hinka e autostradës Tiranë–Elbasan. Do të jetë autostradë e kategorisë A, sipas të njëjtave standardeve që ka aktualisht rruga Tiranë–Elbasan”, deklaroi Karakaçi.
Sipas tij, projekti pritet të sjellë një zgjidhje për trafikun e rënduar në këtë zonë, veçanërisht gjatë sezonit turistik. Për ndërtimin e bypass-it janë lidhur tashmë dy kontrata nga Autoriteti Rrugor Shqiptar.
Faza e parë përfshin rreth 3 kilometra, duke nisur nga pika ku përfundon rruga Tiranë–Elbasan dhe duke vijuar deri në zonën e Kombinatit Metalurgjik. Punimet kanë avancuar, ndërsa hapja e kantierit është lehtësuar nga shpronësimet e kryera më herët.
Ndërkohë, pjesa vijuesе e aksit, deri në afërsi të Peqinit, pritet të prokurohet gjatë vitit të ardhshëm.
Ministri Karakaçi theksoi se rëndësia e projektit lidhet me krijimin e një ndarjeje më të mirë të flukseve të trafikut drejt juglindjes dhe jugut të Shqipërisë, si dhe me integrimin e bypass-it me akset kryesore rrugore.
“Bëjmë ndarjen e trafikut ndërmjet pjesës juglindore të Shqipërisë dhe pjesës jugore, por njëkohësisht krijojmë ndërlidhjen mes autostradës Tiranë–Elbasan, bypass-it të Elbasanit dhe korridorit Elbasan–Qafë Thanë”, u shpreh ai.
Sipas ministrit, bypass-i pritet të krijojë një zgjidhje më të integruar për qarkullimin rrugor dhe të përmirësojë lëvizjen në një prej akseve të rëndësishme të vendit.
